Ang Babaye sa Bentana

(Gula 26)

Nagkaakob gayod ang ilang mga ngabil sa pinadulot  nga hinagkanay. Nagtinal-opay ang ilang mga dila. Daw gusto nilang ipahungaw sa usag-usa ang kauhaw sa pagmahal. Gitupsan pag-ayo ni Cyrus ang mga ngabil ni Cheska a.k.a. Melissa Viloron.

Mikiat ang mga kamot ni Cyrus sa pagpanghinol sa pribadong mga bahin sa lawas ni Cheska. Wala motutol ang dalaga sa iyang gibuhat. Ingon sa hingpit kining mipaundayon sa kalalim sa iyang gihimo. Gipasagdan lang siya niini.

Kun buot pang angkonon dihadiha ni Cyrus ang pagka babaye ni Cheska, molampos siya sa paghimo niini sa dakong kasayon. Ang kainit sa hinagkan sa dalaga kaniya nagmatuod nga andam na kining motahan sa bandila niini kaniya.

Apan dili gustong magdali-dali si Cyrus. Gusto siyang inanay ang pagpahamtang niya’g panimalos sa babaye nga maoy iyang gibasol sa pagpakamatay sa iyang manghod. Gusto siyang matagbaw sa pagpanimalos sa babaye. Gusto niyang masakitan pag-ayo si Cheska alyas Melissa sa iyang giplanong panimalos.

Karon pa lang, ingon sa napahinglantawan na ni Cyrus nga molampos gayod siya sa gilaraw niyang panimalos ngadto kang Melissa alyas Cheska. Gikasilagan niya ang maong babaye! Ug wala nay makapugong kaniya sa pagpanimalos niini.

“Husto na,” si Cyrus ang milunga dihang iyang namatikdan nga ingon sa mikuyamang na sa kalawasan ni Cheska ang sensasyon sa gihimo niyang pagana. “Tingalig makalimot unya ta sa atong kaugalingon.”

Nagsalo silag pangaon sa paniudto. Lamiang mga pagkaon ang giandam ni Cheska sa lamesa alang nilang duha. Pagkahuman, namalik sila sa sala ug nanan-aw og DVD hangtod sa pagkahapon.

“Abi mo,” ni Cheska pa samtang nagpasabak ni Cyrus. “Misamot ang belib nako nimo.”

“Ngano man?” Nangutana si Cyrus.

“Kay dili ka mapahimuslanon sa higayon. You’re a perfect gentleman. Lain pa tingaling lalaki nga akong gikauban, nabugha na ko. Lahi ka sa uban.”

Nahimuot sa hilom si Cyrus sa gisulti ni Cheska. – Sumpayan pa