Dugos Ni Eva

Gula 194

Midali kog lusad paingon sa sala. Niining tungora, nagsige nag bosina ang nahiabot nga sakyanan. Si Nang Badang mibiya sa iyang gibuhat sa sala aron ablihan ang gate. Milili ko sa kilid sa bentana aron pagsusi kun kinsay nahiabot. Maoy akong nakita ang sakyanan ni Mr. Prax Vidoya nga misulod.

Apan si Paul ray akong nakit-an nga mikanaog. Wala nako makita si Mr. Vidoya.

“Hain man diay si Sir Vidoya, Paul?” Nakadungog ko nga gipangutana ni Nang Badang si Paul.

“Tua sa iyang opisina,” maoy tubag ni Paul.

“Nganong mibalik ka man?”

“May nakalimtan si Sir sa iyang lawak. Iya kong gisugo pagkuha niini.”

Ug nakita nako si Paul nga mibiya sa atubangan ni Nang Badang. Milakaw kini paingon sa front door sa dakong balay. Midali ko pagbiya sa kilid sa bentana sa sala ug miadto sa kosina. Dili ko gustong makita ko ni Paul sa may sala.

Samtang didto ko sa may kosina, misantop sa akong hunahuna nga posibleng ang armas nga akong naukayan didto sa kuwarto ni Mr. Prax Vidoya nga gipailadman sa unlan ibabaw sa kama maoy gibalik ni Paul. Nalimtan gayod diay kini sa among amo.

Naniid lang ko sa palibot. Nagpabilin ko sa kosina. Dihang nabati na nako ang andar sa makina nga nagpalayo, mibalik ko sa sala. Wala madugay, nahiabot si Nang Badang gikang nagsera sa gate nga puthaw.

“Nahuman ka na bag limpiyo sa lawak ni Sir Vidoya, Day Eva?” Gipangutana ko ni Nang Badang.

“Oo, Nang,” laktod kong tubag.

“Hain na man ang bed sheet sa kama ni Sir Vidoya nga labhonon na?”

“Wala lang una nako ilisi ang bed sheet sa kama ni Sir, Nang. Dili pa man kini labhonon.”

Maayo gani kay wala na mangutikuti si Nang Badang. -- Sumpayan pa