Dugos ni Eva

Gisugdan dayon nakog panglimpyo ang lawak ni Mr. Prax Vidoya. Maoy akong giuna ang banyo. Gisunod nako ang palibot sa lawak. Gilampasoan nako ang salog ug gitrapohan ang bildo sa bentana nga gikapalan na sa daghang abog.

Human nakog panglimpyo, mao nay sunod kong buhaton ang pag-ilis og limpiyong bed sheets sa kama ni Mr. Vidoya. Ilisan usab nakog punda ang iyang mga unlan. Pero dihang akong gipunit ang iyang unlan aron kini tangtangon sa punda, misiga ang akong mga mata. Akong nakita didto sa kama nga nahilun-an sa unlan ang usa ka pistola. May armas nga gipailadman sa unlan ni Mr. Vidoya!

Kalit lang kong gikulbaan sa akong nakita. Nagpanghapyod ko sa akong dughan dungan nga pagsibog palayo sa kama. Nabuhian nako ang gigunitang unlan. Nahasandig ko sa bungbong sa lawak. Tungod kay nakalitan ko sa pagkakita nako sa armas, ingon sa nablangko sa makadiyot ang akong hunahuna.

Pagkilab sa pipila ka daklit, inanay nang mibalik kanako ang maayong panghunahuna. Nakapangutana ko sa akong kaugalingon kun nganong nagbaton man og armas si Mr. Vidoya. Duna kaha siyay kontra? O nanagana lang siya og tingalig may mga tawo nga mag-interes sa iyang kinabuhi tungod sa iyang kaadunahan maong nagtiner siyag armas? Pero nganong wala man dad-a ni Mr. Vidoya ang maong armas sa iyang paglakaw? Nahikalimtan kaha kini niya?

Gipunit nako ang unlan nga nahulog sa salog ug gipahimutang ko kinig balik sa ibabaw sa kama. Giuli ko kini sa nahimutangan niini kaganina diin natabonan ang armas nga gipatong sa kama ni Mr. Vidoya. Nakahunahuna ko nga dili na lang ihinayon ang pag-ilis og bed sheets sa kama ni Mr. Vidoya ug ingon man sa punda sa iyang unlan. Kay kun buhaton ko kini, seguradong magduda ang among agalon nga nakakita ko sa armas nga iyang gipailadman sa unlan ibabaw sa iyang kama.

May sakyanan nga mihunong sa tungod sa balay sa mga Vidoya. Midali kog gawas sa lawak ni Mr. Prax Vidoya. (Sumpayan pa)