Ang Babaye sa Bentana
(Gula 22)
Ingon sa nakutaw ang kaisipan ni Cyrus sa kamatuoran nga iyang nadiskobrehan mahitungod sa matuod nga pagka tawo ni Cheska. Wala siya magdahom nga ang dalaga mao diay ang babaye nga iyang gipangita aron panimaslan, si Melissa Viloron sa tinuod nga kinabuhi. Ang babaye nga iyang gikasilagan ania ra diay sa iyang duol.
Misantop dayon sa hunahuna ni Cyrus nga iyang dula-dulaan si Cheska a.k.a. Melissa Viloron. Dili lang una siya magpasabot nga nasayod na siya nga nangalyas kini. Pasudlon niya’g maayo si Cheska sa iyang laang aron mas tam-is ang buhaton niyang panimalos. Gusto niyang mosalig pag-ayo si Cheska kaniya.
Wala gyud diay siya masayop sa iyang hukom nga dili tug-anan si Cheska sa tinuod niyang ngalan. Kun iya pa kining gitug-anan, tingalig magduda na kini kaniya. Posibleng dili kini makigsuod kaniya labina kun nasayran pa niini nga igsuon niya si Wayne Ampolis nga nahimong hinigugma niini.
Giuli ni Cyrus ang diary ni Cheska o Melissa ngadto sa gibutangan niini. Mibalik siya’g tan-aw sa gipasalidang DVD nga James Bond movie. Kinahanglang dili magduda si Cheska nga nasusihan ug nabasa niya ang diary niini.
Alang kang Cyrus, utokan sab si Melissa a.k.a. Cheska. Gigamit sa dalaga ang dakong kantidad sa salapi nga iyang gisibat gikan sa kompaniya nga gitrabahoan nila ni
Apan walay tinagoan nga dili madayag. Ug karon nabisto na ni Cyrus ang kamatuoran nga gitago ug gilikay ni Cheska sa kahayag. Nasayran na niya nga si Cheska mao diay si Melissa Viloron. Bistado na si Cheska ngadto kaniya.
“Wa ka ba laaya sa pagpinaabot nako?” Nangutana si Cheska dihang nahibalik na kini sa sala nga presko ug humot kaayo kay bag-ong kaligo.
“Wa man,” ni Cyrus pa. “Nalingaw ko sa pagpangispiya ni James Bond.” – Sumpayan pa
- Latest
- Trending
