Payag nga natumba

Dili tiaw ang akong kahibulong nga human sa kasal ni Repsala, kang Lolo Bartolo ... ingon sa wa lay timik sa iyang nahimutangan. Ako baya ang gikulbaan nga bisan tiguwang na kining iyang nabana nga katalirongan pa gani ni Lolo Oming, dili gayod kakompitiyansahan, ilabi na nga usa kini ka nailhang karate expert?

"Ako baya ang gikuyawan kanimo Repsala nga karong gabii ... seguro gayod nga balian ang imong gusok ni Lolo Bartolo, bisan tuod usa na siya ka tiguwang?" dihay pahimangno ko sa akong anak.

"Panahon pa kadto Nay Porlang, diin nakabaton pa og kusog kanang akong nabana nga tiguwang!" prangka nga gitubag ako sa akong anak.

"Seguro ... dili na kana siya makaromansa pa ug magduka na lang ... hangtud nga nakatulog nga magduay og laway!"

Ang tinuod ... napugos na lang og pakigminyo si Repsala kang Lolo Bartolo, gumikan sa among yuta nga na-loan sa panahon nasakit og laygay si anhing Pidoy.

"Kun ingon na lang niana nga imbargohonon ang atong lona sa yuta nga na-loan sa banko sa panahon nga nasakit si anhing Tatay Pindoy ... sugton ko na lang bisan supak sa akong kabubut-on si Lolo Bartolo!" gidaygan ako ni Repsala.

"Unya Repsala ... makahatag pa kaha nimo og kalipay si Lolo Bartolo, nga mangihi na man lang gani kana siya sa iyang purol nga way kalibotan?" dihay tuno sa kabalaka sa akong pangutana.

Dili man god ikalimod ... nga sa panahon sa ikaduhang gubat sa kalibotan usa diay ka Tenyente sa kasundalohan kini si Lolo Bartolo ug sa pagkakaron hilabihan kadako sa iyang pension nga madawat matag buwan. Ang nakaayo kay pulos na nangaminyo ang iyang upat ka anak ug atua na manimuyo sa Mindanao.

"Dili ka mahigawad kanako akong mahal nga Repsala," kausa akong nadunggan nga gihagawhaw ni Lolo Bartolo ang akong anak.

"Impas ang tanan ninyong utang sa banko ... sa panahon nga disidido kang magpakasal kanako!"

Sabado sa tungang gabii. Gipanid-an ko ang bag-ong magtiayon. Didto manghigda si Lolo Bartolo uban sa akong anak sa may payag nga gihimo namong kamalig sa mais.

Sa akong hunahuna ... kun matinuod ang pasiuna nga giingon kanako ni Repsala nga si Lolo Bartolo gumikan sa iyang pagkatiguwang magduka na lamang ug magduay sa iyang laway ... mas labi hinuon nga maayo ... kay way bun-og ang iyang kalawasan?

Takulahaw ... giabot ako og kahibulong nga wa man untay linog ug ngano gayod nga kalit man lang natumba ang among payag diin mao na lamang akong nabati ang dinangoyngoy ni Repsala nga nagkanayaon.

"Nayyyy Porlangggg ... pagkadakoooo diayyyy saaa alhooo ngaaa gibunallll kanakoooo niiiini Loloooo Bartoloooo!" (Kataposan)