Ang babaye sa bentana

Gula 11

Gitutokan ni Cyrus ang babaye nga nanambo sa bentana sa atbang nga balay. Guwapa gyud ang maong babaye. Morag si Catherine Zeta-Jones. Ang gilay-on sa balay nga gipuy-an sa babaye sukad sa iyang nahimutangan mga unom ka metro lang busa naklaro gyud niyag maayo ang panagway sa babaye.

Gibusog ni Cyrus ang iyang mga mata sa pagtan-aw sa makabibihag nga katahom sa babaye. Miungot pag-ayo ang iyang tinan-awan ngadto niini. Kun may kamandag pa tingali ang iyang mga mata, hayan nahilis na ang babaye sa maduloton niyang pagtutok.

Sa wala lang damha, milantaw ang babaye sa iyang nahimutangan sa may bentana. Wala lang tuyoa nga nagkatagbo ang ilang mga tinan-awan. Gikidhatan niya ang babaye. Abi niya’g masuko kini sa iyang gibuhat. Mipahiyom man hinuon kini kaniya dayong biya niini sa may bentana.

Taudtaod nang nawala ang babaye didto sa may bentana sa atbang nga balay apan nagpabilin pa si Cyrus sa iyang nahimutangan. Gipaabot niya nga mamentana pag-usab ang babaye. Apan wala na. Serado na ang bentana sa atbang nga balay.

Mibiya si Cyrus sa bentana. Milingkod siya sa bangko atubangan sa usa ka lamesita sulod sa iyang lawak. Maoy iyang gihunahuna ang babaye nga iyang nakita sa atbang nga balay. Wala siya makasabot sa iyang gibati. Ingon sa misayaw ang iyang kasingkasing kaganina dihang gipahiyoman siya sa babaye.

Kinsa kaha ang maong babaye? Dalaga pa ba kaha siya? Milanog kining maong mga pangutana sulod sa iyang hunahuna.

Ingon sa misugmat ang pagka-womanizer ni Cyrus pagkakita sa maong babaye. Karon pa lang gani, nahimugso na ang mainitong tinguha sa iyang galamhan pag-angkon niini. Nabuang na ba siya? O nagsalimuang ang iyang hunahuna sa katahom niini?

Nakapangagho si Cyrus. Bisan unang higayon pa lang niyang nakita ang maong babaye apan nakaseguro na siyang type niya  kini. Already, his body ached for her. He wanted her. He longed to be inside her. Kanindot kaha kun maangkon niya ang pagka  babaye niini! -- Sumpayan pa