November 29, 2007 | 12:00am
(Gula 6)
Segun sa nasayran ni Cyrus, hinigugma ni Wayne si Melissa Viloron. Pareho silang nagtrabaho sa usa ka kompaniya sa cooling systems products nga nagbase sa Sugbu. Si Wayne maoy chief accountant sa kompaniya samtang cashier usab si Melissa.
Misibat si Melissa sa kompaniya dala ang kuwarta nga mikantidad og P5.8 milyon nga isuweldohay sa mga empleyado. Naproblema si Wayne sa gibuhat ni Melissa tungod kay gi-forge man niini ang iyang pirma aron maka-withdraw kinig kuwarta sa bangko.
Gumikan sa pagkahanaw ni Melissa, si Wayne ang nag-atubang og imbestigasyon. Naguol pag-ayo si Wayne sa maong hitabo. Gawas nga gisakitan siya sa kalit nga pagbiya ni Melissa tungod kay gihigugma man kini niya pag-ayo, nagbilin pa gayod kinig dakong problema kaniya nga hayan iyang ikabilanggo sa tibuok niyang kinabuhi.
Aron pagtapos sa tanang problema, naghikog si Wayne. Gidetalye kining tanan sa suicide note nga na-recover sa kuwarto diin nakaplagan ang patay’ng lawas niini didto sa Sugbu. Nasuta sa kapolisan nga walay foul play ang kamatayon ni Wayne. Ug base sa kasayoran nga nakuha ni Cyrus gikan sa mga imbestigador, wala pa makagawas sa Sugbu si Melissa. Gibantayan na sa kapolisan ang tanan niyang possible exits.
“Panimaslan ko siya,” bahad ni Cyrus sa hilom. “Siya’y nakaingon sa kamatayon sa pinangga kong manghod busa kinahanglang magbayad siya’g mahal.”
Samtang padayon pang gihaya si Wayne, si Cyrus naghan-ay og mga plano kun unsaon niya pagpahamtang og panimalos ngadto kang Melissa Viloron. Gusto niyang ipatagamtam ngadto niini ang labing pait nga panimalos. Buot niyang matagamtaman niini ang kasakit nga labaw pa sa nasinati sa iyang manghod nga si Wayne.
Unya, misantop sa hunahuna ni Cyrus ang sakit nga mitakboy kaniya. Nakahunahuna siya nga gamiton kini sa iyang pagpanimalos kang Melissa. Usa ka pinong paagi sa panimalos ang iyang buhaton aron wala siya’y tulobagon sa balaod kun unsay mahitabo kang Melissa. Ipaagi niya sa laygay apan seguradong kaalaotan ang pagpanimalos kang Melissa. Patakdan niya kini sa HIV virus nga mitakboy kaniya! – Sumpayan pa
