May kalag gyud ang tawo

Pasiuna: Tinuod kining maong hitabo ug ang mga ngan sa mga karakter ingon man ang dapit giusab na. Gisugid kini ngadto sa tagsulat moduha na ka tuig ang milabay.

Daku og natabang ang akong uyoan nga si Abner nga makasud akog trabaho sa munisipyo sa lungsod sa amihanang bahin sa probinsya sa Sugbu. Magsusulat man gud ug kolumnista sa usa ka inilang inadlaw’ng mantalaan sa Sugbu si Tiyo Abner maong daku og impluwensiya sa mga politiko. Sa akong banabana, hapit na magsetenta anyos si tiyo ug abtik lang gihapon.

"Pina, ayaw gyud tawon pagbinuang sa imong trabaho diha sa munisipyo aron di ko mauwawan sa mayor nga akong gihangyo nga mahimutang ka,," pahimangno sa akong uyoan sa dihang miduaw siya sa among balay sa Borbon usa ka adlaw niana.

"Makasalig ka Tiyo nga magbinuotan gyud ko kay sayud kong di sayon ang pagsud og trabaho karong panahona." Maoy akong pasalig kaniya.

"Maayo. Na hala, di na lang ko magdugay kay ihatud pa nako kining akong artikulo sa siyudad kay deadline na ra ba karon aron masometer ko kini ngadto sa editor sa The Freeman."

Maayong magsusulat si Tiyo Abner ma-iningles man o binisaya. Gani, nag-korespondente pa kini sa langyaw'ng pamantalaan. Hilig kining moinom og beer ug matud pa sa kaubanan niya sa panulat nga ang paboritong sagad niyang awiton kun atua siya sa opisina sa The Freeman mao ang "Sa langit walang beer ... kaya dito inom tayo nang inom..."

Dinhi sa siyudad sa Sugbu magpuyo si Tiyo uban sa iyang pamilya ug mag-ulian siya sa Borbon diin may beach house siya sa gamay'ng luna nga iyang nabahin sa namatay nilang ginikanan nga ako usab nga apohan. Didto siya usahay magpalabay sa adlaw kun mopahuway siya sa iyang pagpanuwat. Adto usab usahay niya dad-a ang mga kauban niyang mga magsusulat kun gusto silang mangaligo sa dagat nga way samok sa ubang mga tawong dili nila mga kaila.

Usa ka higayon niana, adlaw kadtong Domingo ug nagluto kog pagkaon alang sa among panihapon didto sa kusina nga di ra usab layo sa sala. Wa nako tuyoa nga nakalingi ko sa among sala ug labihan nakong pagkahibulong kay nakita ko si Tiyo Abner nga nagtindog duol sa may sopa. Nagsul-ob lang siyag short susamang purontong nga sagad maoy iyang gamiton kun maligo siya sa dagat. Ingon sa bag-o pa siyang gikan naligo og subo ang iyang panagway.

Gumikan kay may gimantikaan man kong isda wa dayon ako makatagad ni tiyo. Apan daku kong kahibung kay sa akong paglingi pag-usab kalit nawa ang akong uyoan. Nagtuo lang usab akong mihapit lang siyag makadiyot ug kay may gibuhat man ko nakahukom siyang molakaw na lang.

Igo kong nahuman sa pagmantika sa dihang miabot ang akong ig-agaw'ng si Baby nga naghangos.

"Pina! Pina! Pastilan..."

"O, ngano?! Unsay nahitabo, Be?"

"Si tiyo Abner ba? Kining ... hipalgang wa nay kinabuhi nga naglutaw kaganina duol sa iyang beach house!"

"Unsa?! Wa ka magtiaw baby? Unsang orasa nga nakit-an ang patay niyang lawas?" nako pa nga daw di makatoo.

"Mo-usa ka oras na kapin. Karon pa lang ko ka lugar pagpahibawo nimo kay nagubot mi didto nga gipahibawo sa nagpuyo duol sa beach house."

Wa na ko makatingog ug wa na lang sab nako siya sulthi nga di pa lang gyud dugay nga giduaw ko ni tiyo nga sa akong pagtuo iya na diay kadtong kalag. (Kataposan)