Ang bulawan sa mga demonyo

Kanus-a man nato ni kawta Bay?  nangutana si Islaw.  "Unyang gabii sa alas siete," tubag ni Lino. "Nganong sa gabii man ta magkawot Bay?" "Tingali'g makit-an ta og tawo labi na sa tag-iya sa yuta kay wala ra ba ta mananghid."

"Unya kun dili nato mahuman unyang gabii?"

"Wa na tay mahimo kondili ipadayon na  lang nato og kalot sa adlaw."

Pagka-gabii, lima ka tawo ang kuyog ni Lino lakip sila si Islaw, Pedring ug Primo ug lain pang duha. Gibuntagan sila apan upat ra ka tiil ang ilang nakalot.

"Sa imong banabana Bay, unsa kalawom ang deposito?"

"Sa detection akong nabanabana nga ania ra sa kinse ka tiil kay gilubong man ni og pito ka tiil apan tungod sa kadugay na mitubo ang yuta tungod sa ulan ug baha ug mibantok pa gayud."

Nianang ikaduhang gabii, nag-init si Lino og tubig para sa kape ug gipagawas ang mga pan sa iyang bag.

"Saka una mo diri kay mag-kape ta," matud ni Lino sa duha ka tawo didto sa lungag dayong agda sa mga kauban nga didto sa ibabaw. Mipahilona ang grupo sa gikatag nga mga langkay sa lubi.

"Unsang orasa na diha Bay?" nangutana si Islaw.

"Alas onse pa lang Bay."

"Morag dili ta kahuman niining gabhiona Bay."

"Dili gyud ni mahuman karon pero ugma sa gabii, human gyud ni bisan mangatulog ta ugma sa adlaw kay wala tay pahulay tibook gabii ug tibook adlaw."

"Maayo hinoon Bay kay kapoy kaayo ko ug katulgon."

Kalit lang nga dunay yuta nga giitsa ngadto kanila gikan sa lungag.

"Bay, tan-awa no kun kinsay nangitsa og yuta nga nia man tang unom. O, dad-a ning plaslight."

Mibalik si Islaw wa madugay nga nagkurog, "Bay, wa may tawo sa lungag pero duna may nagpala nga dili makita."

"Komedya diha Bay, ambi nang plaslight kay akoy tan-aw ug demonyo ba siya. Apan wala nay nagpala pagtan-aw ni Lino.

Pagkahuman ug painit, namalik na ang duha ka tawo sa lungag samtang ang laing duha maoy tigdawat sa balde sa yuta samtang si Lino ug Islaw maoy mopuli sa kapoyon.

Nagsugod sila og sayo sa sunod gabii. Ala una sa kaadlawon mitawag si Islaw, "Bay, nia na ang butang."

"O, sige pag-guantis mo og goma kay tingalig duna nay hilo," dayong itsa ni Lino sa duha ka paris nga guantis.

Puniton na unta ni Islaw ang mga gold bar apan kalit nga may miaso ug may demonyong sungayan nga nagbugwak og kayo nga naglingkod ibabaw sa gold bar. Sa kahadlok dali nga misaka sa hagdanan ang duha ug nanagan silang unom. Duha ka oras ang milabay ug pagbalik nila pulos lapok na lang ang ilang nakita. – Kataposan