Ungo nagtanggo

Bata pa si Kolas mahiligon na siya nga mosayaw. Gani, apil gyud siya pirme kun dunay sayaw nga presentasyon diha sa ilang eskuylahan sa Bituon Elementary School. Ganahan usab ang iyang mga maestra kang Kolas kay lagi graceful kaayong mosayaw ug humokon usab siya og lawas.

Sa mga dance contest sa mga barrio fiesta kanunay gyung makailog si Kolas sa mga major prizes. Dihang nagtungha na siya sa high school may trahedya nga nahitabo sa ilang pamilya kay namatay man ang iyang amahan tungod sa ataki sa kasingkasing ug wala dangtig dugay misunod pod dayon ang iyang inahan.

Ug maong nag-inusara na lang siya sa ilang balay. Tungod niini, misuway siya’g aplay sa pagka-working student sa usa ka inilang unibersidad ug gidawat siya.

Ug aron pod dunay pang-allowance mi-sideline siya pagka DI o dance instructor sa usa ka dance school. Ug maong nainila siya tungod lagi sa kaanindot niyang mosayaw.

Unya, usa ka hapon may usa ka gulangong babaye nga miduol kang Kolas ug mipasabot kini nga magpatudlo kinig sayaw ni Kolas. Miuyon si Kolas human sila magkasabot sa oras nga itudlo ni Kolas. Dinhi sa sayawan dili Kolas ang itawag kaniya kun dili Nick kay mora man god og probinsiyano ra kaayo ang pangalan nga “Kolas”.

“Abi nimo, Nick, ikaw ra gyud ang akong naayonan sa tanang dance instructor dinhi,” nagkanayon ang babaye. Unya may nahibudngan si Kolas sa babaye. Kay may pagka sigahon kini’g mata ug unya kanunay lang magpuwa. Hinuon, dagko ang mga “tip” ang ihatag sa babaye kaniya nga nagpaila sa pangalan nga Agustina.

Usa ka gabii, giimbitar si Kolas sa babaye nga ginganlag Agustina nga adto na lang siya tudloi sa balay niini. Miuyon lang pod si Kolas. Miliraw ang mga mata ni Kolas nga nasorpresa sa kadako sa balay ni Agustina, nindot ang estilo nga morag panahon pa sa mga Katsila ang desinyo.

“Nindota diay nimo’g balay, no, Ma’am,” ni Kolas nga midayeg.

Igo lang mipahiyom si Agustina. Dayon, giagda si Kolas ni Agustina nga mangaon. Mga lamian kaayong pagkaon ang diha sa ibabaw sa talad ug natagbaw gyud si Kolas. Unya, pagka tuadtaod, gipatugtog ni Agustina ang iyang estereo. Tango ang gipatokar ni Agustina.

“Tana, manayaw na ta, Nick,” matud pa sa babaye nga si Agustina. “Ug karong taudtaod, Nick, imo na kong mailhan kun kinsa ko o unsa gyud ang matuod kong pagkatawo....”

Misugod dayon sila pagsayaw og tango. Nindot kaayong modala si Kolas sa iyang pagpakigsayaw kang Agustina. Ug sa ilang pagpadayon sa pagsayaw, nahiabot sila sa binuksang lawak ni Agustina ug didto, sama sa giingon si Agustina, namuhi ni Agustina kang Kolas ug mitungtong kini sa ibabaw sa kama. Unya namulong, “Nick, tan-awaaaa...tutokiii koooo pag-ayooooo...” Ug dinhi maoy nakita ni Kolas ang pagka usab ni Agustina kay nahimo man siyang usa ka dakong iro nga itom. Puwa kaayo ang mga mata niini nga nagtutok kang Kolas nga morag kahambaton.

“Nggrrrrrrrrbbbbbb...” Mingulob ang itom nga iro.

Ug tungod sa kalisang morag gilupad lang ni Kolas ang pagkanaog niya gikan sa dakong balay nga gipanag-iya sa tinudloan niyang ungo nga si Agustina. – Kataposan