Buta ang gugma

Gula 37

Gituman gayod ni Julius ang iyang gisulti nako. Pagka Domingo, misimba siya sa among simbahan sa Church of God in Christ, Mennonite. Human sa simba, gipaila ko siya sa akong mga kauban nga born again Christian. Gipaila ko sab siya sa among lider nga si Pastor Fuentes. Madasigon siyang nakigsulti sa among pastor. Labihan nakong lipaya sa gesture nga gipakita ni Julius.

“Mahimo bang manuroy ta ron?” Giingnan ko ni Julius human sa panagsulti nila ni Pastor Bal Fuentes. “Duna koy paliton ug gusto ko nga imo kong kuyogan.”

“Nganong dili,” nako pa. “Dili mahitabong balibaran ko ikaw kay gilipay ko nimo karong adawa, Julius.”

Gikan sa among simbahan, nangadto kami si Julius sa Ayala. Nangaon una mi. Pagkahuman, misulod mi sa usa ka book store. Mipalit siya’g libro. Unya nanan-aw mig sine. Samtang didto mi sulod sa sinehan, nakamatikod ko nga may gika-text si Julius. Wala na lang ko magsusi kun kinsa kini.

“Nag-text nako ang akong brother,” matud ni Julius dihang nanggawas na mi sa sinehan. “Gusto kuno siyang makakita nimo.”

“Unya?” Gisukit ko siya.

“Okey ra ba nimo kun makigkita ta niya karon? Di lang god ta magdugay.”

“Sige. Maayo nuon aron magkaila mi.”

Nanakay dayon mi sa iyang awto. Nag-ilog na ang kahayag ug kangitngit  sa kalibotan.  Gipaspasan niya ang pagpadagan sa sakyanan. Unya nakugang ko dihang gipasulod ni Julius ang awto sa parkingan sa usa ka hotel.

“M-mag-unsa man ta dinhi?” Gipangutana ko siya.

“”Nia dinhi nagpaabot nato ang akong brother,” niya pa.

Nanganaog mi sa sakyanan. Giagbayan ko niya samtang nanglakaw mi paingon sa entrance sa hotel. Mihunong mi paghitungod namo sa nahimutangan sa elevator.

“Paabota lang ko dinhi,” ni Julius pa. “Moadto una ko sa counter. Mangutana ko kun hain nga room nahimutang ang akong brother.” --  Sumpayan pa