Buta ang gugma

Mibangon ko ug milingkod sa ngilit sa akong kama. Nag-ampo ko sa Dios. Nangayo kog pasaylo sa daotan kong damgo. Dakong sala ang akong damgo. Bisan tuod kun bunga lang kini sa katulogon apan dili kini angay i-tolerate. Sa Bibliya, ang akong damgo gitawag og lust of the flesh. Ug sa akong pagdamgo niini, nakasala na ko sulod sa akong kasingkasing. Mao nga kinahanglang mangayo kog pasaylo ni Lord.

Nakatulog kog balik. Malinawon na ang akong paghinanok. Wala na gyod ko magdamgo nga nag-sex mi si Julius hangtod sa akong pagmata nianang pagkabuntag.

Human makapamahaw, nakadawat kog text gikan ni Julius. Giingnan ko niya nga manuroy kami. Kay adlaw man nga Sabado, misugot ko. Gihapit ko niya sa akong gipuy-an ug sakay sa kaugalingon niyang awto, nangadto kami sa Mactan island. Among gisuroy ang tanang nindot nga talan-awon sa maong isla nga nakapadani sa daghang mga turista. Pagbalik namo sa dakbayan sa Sugbu, nanan-aw mig sine. Wholesome nga salida ang among gitan-aw. Pagkahuman, gihatod ko'g balik ni Julius sa akong gipuy-an. Gabii na ming nakaabot sa balay.

"Dili ka na ba lang mosulod?" Giingnan ko si Julius dihang nakakanaog na ko sa iyang awto. "Unya na god pauli. Please..."

"Okey," matud ni Julius dayong palong sa makina sa awto ug nanaog.

Nagdungan mig sulod sa balay. Natukmaan namo si Ivy nga nagbasa og libro sa may sala. Pagkamatikod niini sa among pag-abot, igo lang kining mitimbaya namo ug misulod sa iyang kuwarto. Nanglingkod mi si Julius sa sopa sa may sala.

"Ayaw na lang," ni Julius pa. "Magsultihanay lang ta dinhi sa sala. Okey?"

Mipahiyom ko. Dayong ingon, "Enjoy kaayo ko sa atong pagpanuroy ron."

"Hasta sab ko, Jomelle," ni Julius pa.

Ug mikatay sa lainlaing tema ang among panagsulti. Lapas na sa alas nuybe sa gabii dihang mipauli  si Julius. Gi-lock nako ang front door dihang nakabiya na si Julius. Mosulod na unta ko sa akong lawak dihang gisangpit ko ni Ivy. Morag may mahinungdanon siyang tuyo nako. – Sumpayan pa