Dugos ni Eva

Gula 145

Sa kasayoran nga akong nahipos, akong nasuta nga adunahan gayod kaayo ang pamilyang Vidoya. Dili sab makuwestiyon ang kredibilidad sa pagkatawo ni Mr. Prax Vidoya. Mituo ko sa gisulti ni Nang Badang nga buotan si Mr. Vidoya tungod kay mas nasuheto siya sa kinaiya niini sanglit dugay na man siyang nag-alagad sa mga Vidoya. Tungod niini nakaseguro kong anaa ko sa maayong mga kamot.

Milabay ang usa ka semana. Usa ka higayon niana, mitingog ang message alert tone sa akong cellphone samtang naghigda ko sulod sa akong lawak sa servant’s quarter aron makapahulay human sa akong mga buluhaton. Akong gisusi kun kinsa ang mi-text nako. Karon pa ko mahinumdom nga dugay na diay nga wala nako magamit ang akong cellphone. Dul-an na tingali sa duha ka semana.

Nakugang ko dihang pagtan-aw nako sa screen sa cellphone, akong nasuta nga si Rodney ang mi-text nako. Gikulbaan lang kog kalit. Akong gibasa ang iyang text. Nangumosta siya nako. Nagsusi siya kun hain na ako nga kalit man lang kong nahanaw didto sa among dapit. Gimingaw na kuno siya nako.

Wala ko mo-reply sa text ni Rodney. Dili na ko gustong makabaton pa kamig komunikasyon. Gusto kong kalimtan na siya sa dayon. Hugot ang akong pagtuo nga wala nay kahigayonan pa nga makabaton og katumanan ang among gugma.

Paglabay sa pipila ka gutlo, mitingog ang incoming call alert sa akong cellphone. Si Rodney ang nanawag. Wala nako tubaga ang iyang tawag. Alang nako, wala na kami angay pang panagsultihan. Tingalig iya lang kong pasakitan sanglit ang ako mang amahan maoy nagpatay sa iyang amahan. Maong wala gyud nako tubaga ang iyang tawag. Pagkataudtaod nahunong ang pagbagting sa cellphone.

Apan paglabay sa singko minutos, mibagting pag-usab ang akong cellphone. Si Rodney gihapon ang nanawag. Wala gihapon nako tubaga ang iyang tawag. Nagpadayon pagbagting ang cellphone apan gipasagdan ko lang kini. -- Sumpayan pa