Buta ang gugma

Gula 26

Human sa panagsulti namo ni Ivy, misulod ko sa akong kuwarto. Mihigda ko sa mahunolhunol nga kama. Ang akong mga mata nagpitawpitaw samtang nagtutok sa kisame. Lawom ang akong gihunahuna. Maoy nagdula-dula sa akong kaisipan sila si Julius ug Alvin. Gitimbangtimbang nako kun kinsa nilang duha ang mas bug-at sa akong kasingkasing. Gisuta ko sa akong kaugalingon kun unsay ilang papel sa akong kinabuhi.

Bisan unsaon nakog timbangtimbang, dili ko gyud katugbangan ang gugmang gibati ni Alvin para nako. Sa kadugay na sa iyang pagpangulitawo nako, wala gyud ko makakat-on sa paghigugma niya. Lahi ang akong gibati alang ni Julius. Sukad sa among panagkaila, gibati ko na nga gaan ang akong kabubut-on alang niya. Gani, nabatyagan ko man nga inanay na kong nakagusto kaniya. Hinuon, wala pa nako matugkad sa hingpit kun gugma na ba ang akong gibati niya. Apan kun dili pa lang tungod kay managlahi ang among relihiyon, mahimo tingaling sugton ko na siya.

Takulahaw lang, nahinumdom ko sa pahimangno ni Ivy. Dili kuno ko angay mokompiyansa kang Julius kay daw dili kini kasaligan nga pagka lalaki. Dili ko kombinsido sa gisulti ni Ivy. Mas labaw kong nasuheto kang Julius kay taudtaod na kaming nagkaila. Samtang si Ivy kausa pa lang makakita kang Julius. Dili maayong hukman dayon niya si Julius. Unfair kini alang sa  akong admirer.

Mitingog ang message alert tone sa akong cellphone. Akong gisusi. Si Julius ang nag-text. Tugob sa kagugmahanon ang gipadala niyang mensahe nga nakapatandog sa akong kasingkasing. Daw may talagsaong matang sa pagbati nga migitib sa akong kahiladman alang kang Julius. Paspas ang pagtubo sa maong pagbati.

Mi-reply ko sa  text ni Julius. Gipasalamatan ko siya sa gugmahanon niyang mensahe. Tungang gabii na kong nakatulog tungod sa pagbinayloay namo ni Julius og text messages. Gikilig kog maayo sa iyang mga mensahe.

Nianang pagka Sabado, namisita si Alvin kanako. Nakamatikod ko nga nanimaho siyang alak samtang nagsultihanay mi sa sala. Wala ko molahutay sa pagpakigsulti niya. Gipapauli ko dayon siya kay dili ko ganahan og tawong hubog. -- Sumpayan pa