Dugos ni Eva

Wala motingog si Carlo. Igo lang siyang nanghupaw ug naglingo-lingo. Unya  miduko siya sa akong atubangan. Gipahit niya ang iyang wait.

"Nagpaabot ko sa imong tubag, Carlo," giingnan ko siya.

"Dili pa karon ang hustong panahon aron masayod ka sa lintunganay'ng katarongan nga nagpaluyo sa tanan kong gihimo," matud ni Carlo. "Basta kini maoy timan-i. Adunay mas bug-at nga hinungdan kun nganong gusto kong masayod si Daddy sa tanan bahin kanimo. Pagkakaron, igo lang kong naghawan sa agianan."

"Wa ko ikaw hisabti, Carlo."

"Makasabot ka ra unya inig-abot sa tukmang panahon, Eva."

Dayon mibiya siya sa akong atubangan. Mipaturatoy siya paglakaw hangtod nga nawala na siya sa akong panan-aw. Ang iyang gisulti nagbilin og kalibog sa akong kaisipan. Wala ko makatugkad sa kahulogan sa iyang gipamulong.

Wala ko na lang hasola ang akong kaugalingon bahin sa gisulti ni Carlo nga wala kaayo nako hisabti. Gitapdas ko kini sa akong hunahuna.

Pagkaugma, nagsugod dayon ko sa akong mga buluhaton isip katabang sa panimalay sa mga Vidoya. Wlaa ko maglisod sa akong trabaho kay gigiyahan man ko ni Nang Badang sa angay kong buhaton. Buotan sab kaayo si Nang Badang nako.

Nakahigayon mig panagtagbi si Nang Badang human sa among mga buluhaton. Akong nasayran nga usa diay ka dalagang guwang. Dugay na siyang nag-alagad sa pamilyang Vidoya. Tungod kay lingaw kaayo siya sa iyang trabaho, wala na siya makahunahunag minyo. Buotan kuno kaayo ang among agalon nga si Mr. Prax Vidoya.

"Adunahan gyod tingali kaayo ang pamilyang Vidoya, Nang, no?" Misukot ko.

"Tinuod kana," ni Nang Badang pa. "Silay tag-iya sa XYZ Group of Companies. May lain pa gyod silang negosyo nga wala na ko masayod kun unsang matanga sa serbisyo ang gitanyag niini sa publiko." – Sumpayan pa