Ang kawayan

Gikan sa gilingkuran kong igdal nga gamot sa kahoy’ng tipulo, nasangit ang akong panan-aw sa punoan sa kawayan sa atbang. Matag huros  ug tapdas sa huyohoy nga dulot sa hanging habagat, nakita ko ang nagbawogbawog, naglubaylubay nga mga bulos sa kawayan.

Nagpalingpaling ang mga bulos sa kawayan -- sa silangan, sa kasadpan, sa habagatan ug amihanan. Nabati ko ang matag igot sa naglubaylubay nga mga bulos sa kawayan. Iniglurang sa hangin, tigson nga mopundo sab ang mga bulos sa kawayan. Way kibo. Daw igmat nga naniid na usab sa buylo  ug huros sa umaabot  nga hangin.

Nakapanglingo ko. Way baruganan ang mga bulos sa kawayan, haguka ang punoan niini. Nagpalingpaling lang kini, agad sa matuod nga direksiyon sa hangin.

Nanghupaw ko. Mikibot ang akong baba.

"Ang kawayan ikatandi usab sa kinabuhi ning tawo sa katilingban...!" Daghang talan-awon nga inanay’ng mipasunding karon sa akong handurawan.

Nakita ko karon ang mga saksi sa nahitabong krimen nga mituis sa kamatuoran uban ang nagpalingpaling nga baruganan.

Mipasunding usab sa akong handurawan ang pipila ka mga tinugyanan sa balaod nga nagpalingpaling ang pagka-sinsero sa katungdanan, ilabi na kun matingal sa binandol nga salapi.

Pagkahuman sa eleksiyon, nabulto ang kamatuoran sa tanang mananaog nga politiko karon nga naniid na sa pabor nga hangin aron sakyan ang dakong oportunidad nga makabawi man lang sa dako nilang nagasto sa pagpangampanya sa nakalabay'ng eleksiyon.

Nahatindog ko'sakong gilingkuran. Sa unahan, nasiklapan ko nga nagdangadanga na ang akong gipaabot. Ania na gayud si Ledy, ang babaye nga maoy natingban sa akong pagmahal ug paghigugma. Oo, si Ledy nga akong hinigugma sa among baryo, gikan pa sa among pagka-hayskol ug hangtod karon nga nakatapos na siya sa pagkamagtutudlo ug nahimo nang eligible nga maestra nga nagtudlo sa publikong eskuylahan sa among lungsod.

Haskang paita sa among relasyon. Wa ko mauyoni sa mga ginikanan ni Ledy kay hayskol gradwet lang ug usa lang ka mag-uuma. Gusto sa mga ginikanan sa akong hinigugma nga pakaslan niini ang usa ka enhenyero nga anak sa asyendero og tubo sa among lungsod. Mao kini ang hinungdan nga gihangyo ko si Ledy nga makigkita kaniya karon, aron maghinunatay mi sa among tagsatagsa ka gugma.

Way kadasig ang pamayhon ni Ledy nga miduol kanako.

"Al, gikasubo ko. Di ko makasupak sa kabubut-on sa akong mga ginikanan....!"

"Ang buot mong ipasabot, Leds, nga makigminyo gyud diay ka ni Pepe?"

Hinay'ng miyango si Ledy.

"Mag-unsa na lang ang atong gugma, Leds? Ingon ba lang  ini kasayon?"

"Sakit man, Al, apan wa koy mahimo! Mianhi ako aron bugtuon na lang ang atong relasyon. Di ko igsapayan nga may nahitabo na tali kanato!"

Ug milakaw si Ledy pahilayo kanako. Mihuot ang akong dughan nga misagnunot pagtan-aw sa babaye nga akong gimahal ug gihigugma -- ang babaye nga haguka diay og baruganan.

Nakapanglingo ko. Giliwag ko ang akong panan-aw sa atbang. Sa luhaan kong mga mata, nabantang na usab sa akong panan-aw ang punoan sa kawayan. Nagpalingpaling na usab ang mga bulos niini nga gihuyop sa siaw’ng habagat. Daw mihulma sa akong panan-aw ang panagway ni Ledy diha sa bulos sa kawayan.

Ug mihuot na usab ang akong dughan. – Kataposan