Gipalaum lang diay
Dili tiaw ang gibating kalipay ni Salomon sa dihang nagbunga na ang iyang paningkamot sa pag-angkon sa kasingkasing ni Barbara. Gisugot na gyud siya sulod sa dugay na niyang pagpunay og pamisita sa iyang pinuy-anan sa baryo Basak. Ug karon malipayon kaayo siyang nakigsulti sa nataran sa balay sa dalaga nga gidan-agan sa hayag sa buwan.
"Salamat Barb nga sa kadugayan imo na gyud kung gisugot, ipasalig ko nimo nga ampingan ug mahalon ko ikaw Barbara," nagbutok-butok ang kasing-kasing ni Salomon sa dili tiaw'ng kalipay.
"Laoman ko kana Salomon, ayaw gayod usiki ang gihatag kung gugma diha nimo," nitutok si Barbara ug nipahiyom ni Salomon.
Sa dihang lawom na ang kagabhion, nanamilit na siya ni Barbara aron mopauli kay gibati napod siya og katulogon ingon man ang dalaga.
Sa dihang nakapalayo na siya, nag-untol-ontol sa paglakaw si Salomon timaan sa dili matukib nga kalipay. Tiaw mona nga halos
Dili pa gyud modala og dili mahalon ingon ana ka espesyal si Barbara sa kasing-kasing ni Salomon.
Naanam-anam gud og kahurot ang binuhing kanding niya sa pagbaligya aron lang naa siyay ikapalit og regalo inig pamisita niya sa dalaga.
"Barb! aduna unta koy isugyot nimo ... hamay maayo kong manuroy ta inig ka Domingo," ni Salomon pa.
"Asa man pod ta manoroy," sukit ni Barbara.
"Sa siyudad manan-aw ta'g sine. Anaa may bag-ong pelikula ron ang akong idulong mga artista," gitutokan niya pag-ayo si Barbara ug gugitan og hugot ang kamot.
"Ikaw gud ang mag-igo, ikaw man bitaw ang mogasto. Pero dili lang ta magpagabii kaayo ha! Mouli pa baya ta," nibaiid ang dalaga sa dughan ni Salomon ug paraygon kaayo ang tingog. Mora og nilupad kadiyot ang iyang espirito nga gibati ug kahinam.
Nianang pagka Domingo sa kadlawon nimata siya og sayo. Gipakaon ang pipila ka binuhing kanding ingon man kabaw ug baka. Excited lagi kaayo sa ilang gisabutan nga manan-aw og sine sa siyudad. Wala usiki ang matag takna sa oras nga molabay, pagkahuman niya sa iyang trabaho giatiman napod niya ang iyang kaugalingon.
"Karong taod-taod moabot nato si Barbara," pong pa ni Salomon nga nagbarog sa gisabutan nilang dapit nga pilit kaayo og hinapay sa buhok. Wala magdugay niabot si Barbara ug pula kaayo'g ngabil hasta pod ang nawong niini. Dili sad ikalimod may ika pang hambog man pod gyud nga hitsura si Barbara.
Sa ilang pag-abot sa siyudad: "Mangaon una ta Barb para kondisyon kaayo ta bang manan-aw ba. Ug aron sab dili magkutoy atong tiyan," malipayon kaayo si Salomon.
Ni order sila og mga mahalon ug lamiang pagkaon, unya nibaiid si Barbara ni Salomon ug niingon. "Pahulama una kog kwarta be kay naa koy paliton," nidikit og maayo ang dughan ni Barbara.
"Kana ra diay? Walay problema basta ikaw Barb," pong pa niya. Gikoot dayon niya ang iyang pitaka nga puno sa kwarta nga halin sa baka ug kanding, kay giandaman man lagi niya ning higayona.
"Salm... mag CR una ko kadiyot ha," nagtisngi si Barbara. Igo ra niyango si Salomon nga nagtungab sa softdrink nga iyang giinom.
"Magtulo naman lang ka oras ang nilabay wala paman gyud si Barbara? Dili nani mahimo da! Gibinuangan ko aning kalakiha," napungot ang ulitawo ug giadto niya sa CR sa mga babaye, apan wala na ngadto ang dalaga.
Nipauli nalang siya nga nagmug-ot ang nawong nga puno sa kalagot ug kayugot. Ug mao nalang ang iyang nahibaw-an nga gitaban diay ug laing lalaki ug ang ipa gyung suod nga amigo nga si Juan.
Nakaingon siya sa iyang kaugalingon nga nag-atubang sa pang-pang "mga maluibon, giilad lang diay ko! Wala ko magdahom nga makahimo pagluib nako. Mga bitin mo. Dili pa igo ang halin pa gyud sa kanding ug baka ang inyong gigamit sa pagpahilayo. Gabaan pa unta mo," igo nalang siya namahid sa luha nga niagas sa iyang mga mata. – Kataposan
- Latest
- Trending
