Buta ang gugma
(Gula 6)
Nakalitan ko sa gipadayag ni Julius. Wala ko magdahom nga mangulitawo siya nako. Bisan tuod nga kadali ra ming nagkasuod sukad kami nagkaila apan wala pa ko makatugkad sa hingpit kun may pagbati ba usab ako alang kaniya. Hinuon, gaan ang akong kabubut-on ngadto kaniya apan wala ko makaseguro kun gugma na ba kini. Labaw sa tanan, wala gyud ko maghunahuna nga moabot ang higayon nga mangulitawo si Julius nako.
“May paglaom ba ang akong gugma, Jomelle?” Gisukit ko ni Julius.
“Dili pa ko makahatag sa akong tubag, Atty. Julius Dabaw,” giingnan ko siya.
“Please, ayaw usba ang imong pagsangpit nako. Mas komportable ko kun tawgon lang ko nimong Julius aron dili kaayo pormal.”
“O-okey. Ikaw ang mag-igo.”
“Nganong dili ka pa man makahatag sa imong tubag sa akong proposal?”
“Tungod kay wala pa ko makaseguro kun nahigugma ba sab ko nimo.”
“Dili ba diay mahimo kun sugton mo na lang ako ug ipaulahi na lang nato ang gugma? Let’s be practical. Pareho bitaw kitang mga propesyonal.”
“I’m sorry, Julius. Mahinungdanon alang nako ang gugma. Namong mga born again Christian, love must be first.”
Wala makatingog si Julius. Namingaspingas og diyotay ang iyang nawong.
“Hatagi kog higayon sa pagtimbangtimbang sa imong proposal,” matud ko. “Pero kun dili ka makapaabot, itakli na lang sa laing babaye ang imong gugma.”
“Andam kong magpaabot, Jomelle,” ni Julius pa. “Panghinaoton ko nga sa sunod natong panagkita, dawaton mo na ang akong gugma.”
Sa akong pagpauli sa balay, nagmuok ko sulod sa akong lawak. Si Julius ang kanunay nanumbalay sa akong hunahuna. Bisan unsaon ko siyag salindot sa akong panumdoman apan nagpabilin siyang nagdula-dula sa akong kaisipan. Maoy akong gihunahuna ang gugmang gihalad niya kanako. Sugton ko ba siya o dili?
Pagkaugma, sa akong pagdanga-danga sa eskuylahan nga akong gialagaran, nalantawan ko si
- Latest
- Trending
