Moonlight Romance

Dugos Ni Eva

Gula 124

Nasagmuyo ko sa akong nadiskobrehan. Si Tiyo Miguel ray bugtong kong kadangpan sa Cebu. Apan gidemolis na ang kabalayan sa dapit nga ilang gipuy-an. Wala koy ideya kun hain mobalhin og puyo ang akong uyoan uban sa iyang pamilya.

Nagsusi kog maayo. Nagpangutana ko sa mga tawo nga nagpuyo dili layo sa dapit diin gihimo ang demolisyon. May nakatudlo nako sa dapit nga maoy gihimong relocation site sa tanang naigo sa demolition. Giadto nako ang maong dapit sa pamasin nga atua didto mobalhin og puyo ang akong uyoan.

Apan wala didto ang akong uyoan. Sumala sa mga tawo nga akong gikasulti, milalin na diay og puyo sa laing dapit si Tiyo Miguel sa wala pa mahitabo ang demolisyon. Pero walay nakatudlo nako kun hain mobalhin og puyo ang akong uyoan.

Mibalik ko sa downtown nga huyhoy ang mga abaga. Wala ko masayod kun unsay sunod nakong buhaton. Wala na koy plano nga mobalik ngadto sa Bohol. Naguba na ang among pamilya. Nalambigit sa dakong eskandalo ang banay namo ni Rodney. Maulaw na kong magpakita sa mga tawo sa among dapit.

Naglatagaw ko sa siyudad nga walay tumong. Bisan asa lang ko dad-a sa akong mga lakang. Namasin ko nga may milagrong mahitabo ug magkasugat kami si Tiyo Miguel sa dalan. Siya lang ang gilaoman kong kadangpan sa Cebu.

Dihang nagabii na, miadto ko sa Plaza Independencia. Mihukom kong sa maong dapit lang una magpalabay sa kagabhion. Daghan man usab ang mga tawo sa plaza panahon sa kagabhion. May mga managhigugmaay nga manuroy. Adunay mga turista.

Mipahimutang ko sa akong kaugalingon sa usa ka lingkoranan nga nahimutang ilawom sa dakong punoan sa kahoy. Mihigda ko ug maoy giunlanan ang dala nakong bag. Paglabay sa pipila ka gutlo, dihay lalaki nga miduol nako. Mibangon ko dihang milingkod siya sa tumoy nga bahin sa lingkoranan nga akong gihigdaan. -- Sumpayan pa