Dugos ni Eva

Gula 122

Na-shock ko sa nahitabo. Ingon sa dili ko makatuo nga makahimo si Papa Segundo pagpatay ni Noy Tonyo tungod kay suod silang managhigala.

Sa gihimo kong pakisusi, akong nasayran nga si Papa Segundo igo lang mibarog sa iyang katungod isip bana maong napatay niya ang amahan ni Rodney. Gikabit diay ni Mama Betty si Noy Tonyo ug naabtan gayod sila sa akto ni Papa nga naghilawas sulod sa among panimalay. Wala makapugong si Papa sa iyang kaugalingon. Gipusil niya ang amahan ni Rodney nga maoy hinungdan sa kamatayon niini. Si Mama Betty abtik nga nakasibat ug walay nasayod kun hain na kini karon.

Si Papa nabalhog na sa bilanggoan kay misurender man siya ngadto sa mga awtoridad human niya mapatay ang amahan ni Rodney. Karon pa ko nakaamgo kun nganong nahimong seloso si Papa nga maoy sagad nga hinungdan nga  magkalalis sila si Mama. Nakamatikod na diay si Papa sa lahi nga lihok sa akong inahan ug ang amahan ni Rodney maoy gipangabubhoan niini. Ug kadtong tawo nga nakita ni Rodney nga naglibotlibot sa among balay usa niana ka gabii, posibleng ang iya kadtong amahan.

Nahinumdom sab ko nga usa niana ka higayon, nakita ko si Noy Tonyo nga migawas gikan sa among balay, atol nga wala sa balay si Papa. Posibleng nagsugod na ang ilang relasyon niadtong higayona ug nagmata lang og buntag si Papa. Pero miabot gyud ang panahon nga wala na nila matago ang ilang pagbulingbuling sa ngalan ni Papa kay nasakpan man gyud sila sa akto sa akong amahan.

Daw sa mabuang ko sa maong hitabo. Mibati kog tumang kaulaw sa dakong eskandalo nga nahitabo sa among pamilya. Ingon sa nawad-an kog gana sa pagpadayon sa akong pagtuon. Morag nawad-an og hustong direksiyon ang akong kinabuhi. Nakahukom kong moadto sa Cebu. Wala nako pahibaw-a si Rodney sa akong desisyon. -- Sumpayan pa