May utlanan ang kangitngit
(Gula 56)
Gipasabot ko si Dr. Suave sa akong mga katarongan. Dili ko gustong maoy mahimong hinungdan sa pagkaguba sa iyang pamilya. Ang iyang anak nagkinahanglan pa sa iyang amahanong pagmatuto ug naluoy sab ko sa iyang asawa. Babaye sab ko sama sa iyang asawa. Dili sab tingali lalim sa akong bahin kun akoy budhian og bana.
“Karon na hinuon nga ato na kining nasugdan,”
“Mas maayong putlon ta kining binuanga samtang sayo pa,” gipasabot ko siya. “
Wala motingog si Dr. Suave.
“Propesyonal ka,” giingnan ko siya. “Propesyonal sab ko. No doubt we can deal this thing in a professional way. Total, dili ka na man alkanse. Nakatilaw ka na nako. Nalipay sab ko sa atong gibuhat. Pero dili ta angay magpakabuang sa hingpit.”
Nakasabot si Dr. Suave sa akong tumong. Miuyon siya sa gusto kong mahitabo ug misaad nga dili na siya magsamok nako. Apan matud niya, dili gayod niya mahikalimtan ang nahitabo namo. Human maplansa ang among sabot, nanggawas na kami sa motel. Wala na ko mobalik og sakay sa iyang awto. Nag-taxi ko paingon sa gipuy-an namo ni Ate Zsa Zsa sa Philcoa kay lawom na ang kagabhion.
Mituman gayod si Dr. Suave sa among gikasabotan. Wala na gayod siya magsamok nako. Magtinagdanay man tuod kami kun magkita sulod sa tambalanan apan casual kaayo ang among pagtimbayahay. Dili kami mag-estorya og dugay aron paglikay sa tentasyon. Gipaningkamotan kong dili na gayod madakin-as pag-usab ning madanglog nga dalan sa kalibotan. Dili na ko gustong magpaulipon sa biga.
Pero tungod lagi kay nakatilaw na man ko sa kalalim sa lawasnong kalipay, may mga higayon nga bation ko ang kahidlaw niini. May mga gabii nga mangindahay ko nga adunay lalaki nga makatambal sa akong kahidlaw. Makapasalimuang ang gibati kong kahidlaw. Usahay mosantop si Dr. Suave sa akong hunahuna. – Taposon ugma
- Latest
- Trending
