Dugos ni Eva

Taudtaod nga wala makatingog si Rodney. Ingon sa iyang gitimbangtimbang ang akong gisulti. Iyang gianalisar kun posible bang tinuod ang akong katahap nga usa ka rebelde ang tawo  nga iyang nakita nga naglibotlibot sa among balay.

"Imposible kanang imong pagduda," matud ni Rodney pagkataudtaod.

"Nganong nakasulti ka man niana?" Gisukit ko siya.

"Tungod kay dili ko kombinsido nga hatagan sa mga rebelde og dakong pagtagad ang yanong panaglalis sa magtiayon. Naay daghang mas dagkong butang nga nagkinahanglan sa ilang pagtagad."

"Kun mao, kinsa man diay kadtong maong tawo?"

"Ambot lang. Ang maayo mong buhaton mao nga maniid ka. Basin mobalik kadtong maong tawo ugma o sa sunod ba nga gabii. Maayo nang ikaw gyod ang makakita."

"Diin  man siya paingon sa iyang pagbiya kaganina sa tugkaran sa among balay?"

"Mikatkat siya sa koral ug miambak ngadto sa bakanteng lote sa luyo sa inyong balay. Didto hingpit na siyang gilamoy sa kangitngit."

Naghinuktok ko sa gisulti ni Rodney.

"Ayaw nag hasola ang imong hunahuna bahin niadtong maong tawo," ni Rodney pa dayong ukob og halok sa akong ngabil.

Sa laing higayon, gisaw-an na usab namo ang lawasnong kalipay. Mas makahuloganon ug mas lalim ang maong seksuwal nga kasinatian. Mi-score si Rodney og kapito. Kaadlawon na siyang mibiya sa akong kuwarto.

Pagkabuntag, gisukitsukit ko ni Mama Betty. Nakabati kuno siya nga ingon sa may gikasulti ko sulod sa akong lawak sa miaging gabii. Gikulbaan kog maayo. Wala dayon ko makatubag sa mga pangutana ni Mama. – Sumpayan pa