Ang mapait nga kasinatian

Nag-inusara si Mandot sa ilang balay tungod kay nagtrabaho man ang iyang asawa ug ang bugtong anak niining lalaki dinhi sa siyudad sa Sugbu ug tungod niini tumang kamingaw ug kabalaka ang gibati ni Mandot sa iyang asawa ilabina gyud sa iyang bugtong anak nga lalaki.

Gusto man niya nga motrabaho pero gisakyan  man siya sa dimalas maong hangtod karon wala lang gihapon siya nakatrabaho, ug usa kaadlaw niana nagkita sila sa iyang suod kaayo nga amigo nga si Born ug gihagad siya og pagpangaplay niini.

Bay Dot kuyog ta mangaplay og trabaho, hagawhaw nga tingog ni Born sa paggalgal sa iyang amigo nga si Mandot.

"Asa man ta mangaplay," pung pa ni Mandot sa iyang amigo.

"Ah! basta kuyog lang nako,"  nikuyog gyud si Mandot ngadto ni Born ug dako kaayong kakurat ni Mandot paghiabot na nila sa ilang giaplayan.

"Bay Born anhi ta mangaplay?" hunghung ni Mandot ngadto sa iyang amigo nga si Born.

"Oh! anhi ta mangaplay, ngano  nahadlok ka?" pung pa ni Born ngadto sa iyang amigo nga Mandot.

"Wala man ko nahadlok baya pero ang ako ba unsa man atong nakamahoan nga pangutan-on ta nga pabrika mani sa puthaw."

"Ato lang gyud nga sulayan bay," pong pa ni Born.

Kalit lang nga niabli ang gate ug sa wala sila magdahom nga ang nigawas sa maong gate ila ra sad diay nga silingan nga si Zaldi.

"Bay Zaldi malipayon lagi kaayo kang nigawas sa gate?" nagdungan og pangutana ang manag amigo kang Zaldi." Yes, yehe!! Bay Mandot, bay Born nadawat nako sa trabaho, ug kay nasina ang duha nga nadawat si Zaldi nga ilang silingan. Nangurso gyud si Mandot nga mangaplay para makaabag sa iyang asawa ug anak niini.

Dangtan og tunga sa oras nigawas si Born sa opisina kay si Born man ang unang gi-interview sa manager, "Bay Dot nadawat nako sa trabaho! Yes thank you Lord for giving me a chance," nagluhodluhod si Born sa tumang kalipay nga iyang gibati adtong tungora. Unya sa paggawas ni Born sa opisina nga naglayatlayat sa kalipay ug wala dayon naglangay si Mandot nisulod dayon siya sa opisina kay gipatawag naman siya sa manager adtong tungora.

Nilabang ang pila ka gutlo gikan sa pagsulod niya sa opisina sa manager, nahibulong si Born og nganong nakabalik dayon siya nga masulob-on kaayo og panagway daw gikumot sa agta ang hitsura ni Mandot.

Gipangutana si Mandot ni Born. "Bay unsa may resulta sa  pag-interview nimo?" Wala motingog si Mandot ug igo ra kining naglingolingo sa iyang ulo ug giusban ni Born sa pagpangutana si Mandot. "Bay Dot unsa may resulta sa imong pag-interview? Giagbayan ni Born si Mandot sa iyang abaga nga nangutana, naglingolingo gihapon si Mandot ug midagayday ang mga luha niini gikan sa iyang mga mata.

"Bay unsa may akong sala sa Ginoo nga kun mangaplay ko dili man ko pang dawaton sa akong gipangaplayan?" Nagdangoyngoy si Mandot nga nangutana sa iyang amigo ug sa kaluoy ni Born sa iyang amigo iya kining giam-aman." Bay ayaw basola ang Ginoo, dili gyud siguro ka dapat dinhi bay. Ayaw lang pawala sa imong paglaom bay," pong ni Born ngadto ni Mandot ug sa kaluoy ni Born wala siya nakapugong sa iyang kaugalingon, nakahilak usab kini tungod sa kaluoy sa suod kaayo niyang amigo.

Tungod sa iyang kapakyasan na discourage si Mandot sa pagpangaplay ug karon nagkalingaw nalang siya og pamuhi og mga hayop sama sa mga manok, kanding, baka ug uban pa. – Kataposan