White lady gibugno sa ungo

Dinhi sa among baryo sa Kauswagan wa pa ko kakitag ungo ug hasta white lady. Duna koy nadunggan nga tabitabi bahin sa ungo ug igo lang ko sa pagpaminaw ug magduhaduha dayon ang akong kaugalingon duna ba gyoy ungo o unsa ba.

Unya, wa lang damha nga usa kadto ka gabii dihang namisita ko sa akong uyab nga si Teresita gisugat kog usa ka babaye nga tag-as og buhok ug unya puti ang sinina ang gisul-ob niini sama sa sinina sa madre. Dili maklaro ang nawong. Hayag man god ang buwan maong naklaro nako nga guwapa ang maong babaye segun sa korte sa iyang nawong.

"Bii, Day," matud ko.

Wa motubag ang babaye.

"Bii, Day," miusab ko. Wa gihapon motubag ang babaye. Unya may bugnaw’ng hangin nga mihuros ug nanglimbawot ang akong balhibo nga wa ko tuyoa.

Miduol ang babaye nako ug dihang mibantang ang iyang nawong, nakuyawan ko kay lain kaayo kinig hitsura ug medyo lawom ang mga mata. Wa ko kapugong sa akong kahadlok, mikaratil kog dagan pauli sa amo ug wa na lang ko modayon og pamisita sa akong uyab.

"Unsa, Pilo? May babaye nga misugat nimo kagabii?" miiknat ang kilay sa akong tatay Isko nga morag gibatig kahibulong. "Unya, nganong nidagan ka man?"

"Lain kaayog nawong, Tay, lawom kaayog mga mata ug puti nga hilabihan ka luspad ang nawong," tubag ko.

"Kun mao na, white lady to, Pilo," ni tatay pa nako.

Mao tong dili na ko mokompiyansa kun mamisita ko sa akong uyab kay magdala na kog kinukod nga sulo nga langkay sa lubi.

Unya usa ka gabii dihang namisita na pod ko, hayag ang buwan, ug samtang naglakaw ko paingon sa balay sa akong uyab-uyab kay layolayo man kini, nakadungog kog morag kusog nga kinanaas nga dinuyogan sa morag mga ngulob sa iro ug tingog sa iring. Midali kog kamang ug mipahipi sa lubi.

Ug sa dako kong kahikurat maoy akong nakita nga ang white lady nga misugat nako niadtong miaging gabii, gibugno sa usa ka babaye pod nga nanglikaang ang mga buong ug isog kaayo kining mikawras ug milayog sa white lady. Taudtaod gyod ang ilang panag-away ug panagsambunot. Sa akong tan-aw morag nalupig ang white lady kay kalit man lang nga miaso ang lawas niini  ug unya nahanaw pagkalit.

Haskang kuyawa nako nga wa maglihok luyo sa punoan sa lubi. Pagkataudtaod, bisag diha pa sa akong kaugalingon ang kahadlok, milahos ko sa balay sa akong uyab. Wa si Teresita sa akong pag-abot ug mingaw kaayo ang ilang balay.

Unya dunay kapakapa sa pako ug klaro kaayo ko kining nakita nga mitugpa ang usa ka dakong langgam sa may bentana sa balay nilang Teresita. Mihupo ko ug gipanid-an ang dakong langgam ug wala dangtig dugay naporma kinig tawo ug si Teresita ang akong nakita.

Ginoo ko! nagkurog ang akong mga bukton. Di ko makatuo! Si Teresita ungo diay! Ug wala ko magdugay misutoy kog dagan pauli sa amo ug sukad niadto wala na mi  magkita ni Teresita. Apan matag gabii duna koy wakwak nga mabati nga magpaatbang sa among balay.

Apan wa ko magdahom dihang usa na usab ka gabii niana dihang namisita ko sa lain kong uyab, gisugat kog white lady apan gibugno kini sa kalit lang nga mibutho nga ungong-mangtas nga babaye ug namay-ongan nako nga si Teresita gyod ang ungo, misutoy na pod kog dagan pauli sa amo! – Kataposan