May utlanan ang kangitngit

(Gula 14)

Wala ko makabalibad ni Reuben. Misugot ko nga manan-aw mig sine. Human magkasabot, nanggawas mi sa kan-anan ug nagpahatod ngadto sa Ayala. Nanan-aw mig sine. Ang pelikulang “Matrix Reloaded” nga gibituonan ni Keannu Reeves maoy among gitan-aw. Nindot ang maong pelikula ug nalingaw ko.

Sa sinugdan, pormal nga naglingkod si Reuben sa akong tupad. Pareho kami nga ang atensiyon didto ra sa pelikula nga among gitan-aw. Apan wala pa gani maghinungatunga ang salida, gikabig ko ni Reuben ug misandig ko sa iyang dughan. Unya giukoban niya ang akong ngabil sa mainiton niyang halok. Mipusnga ko tungod kay hangol kaayo ang hinagkan ni Reuben kanako. Gitupsan niyag maayo ang akong ngabil.

“Masakpan gani ta sa guwardiya,” giingnan ko si Reuben dihang milunga siya sa paghalok nako. “Mangiwag ra ba nang sekyu pinaagi sa flashlight.”

“Manggawas ta dinhi,” sugyot ni Reuben.

“U-unsa? Wa pa gani nato matiwas og tan-aw ang pelikula.”

“Bahala na. Basta kay manggawas na ta.”

Tuod man, nanggawas kami si Reuben sa sinehan. Milahos kamig gawas sa Ayala. Sa gawas mipara dayon si Reuben og taxi. Nanakay mi. May gihunghong si Reuben sa driver. Miyangoyango ang driver dayon niining padagan sa taxi. Wala lang nako hatagig dakong pagtagad ang gihunghong ni Reuben sa driver.

“Asa man diay ta, Reuben,” gipangutana ko si Reuben samtang nagpadayon pagdagan ang taxi. “Gabii na baya. Kinahanglang makapauli ko sa amo sa dili pa ang alas diyes kay tingalig kasuk-an ko nila ni Papa ug Mama.”

“Ayaw kabalaka,” matud ni Reuben. “Makauli lagi kag sayo. Duna lang tay adtoon kadiyot. Gikan didto, mamauli na ta.”

Wala na lang ko magtingog. Gianinaw ko ang dapit nga among giagian. Nasuta ko nga morag paingon sa North Reclamation Area ang among gipaingnan.

“Nia na ta,” ni Reuben pa dihang mihunong ang taxi.

Pag-aninaw nako sa palibot, akong nasuta nga diha mihunong ang taxi sa atubangan sa usa ka motel. – Sumpayan pa