Gula 75
Pag-abot nako sa among balay, midiretso ko sa akong lawak. Nag-ilis dayon kog sapot nga pangbalay. Unya mihigda ko sa kama. Nagpitokpitok ang akong mga mata nga mitutok sa kisame. Maoy akong gihunahuna ang nahitabo sa akong pagsimba.
Gibastosan gyud ko sa gibuhat ni Padre Dick nako. Naibog tingali siya nako maong nag-iningon siya niadto. Kahilas paria! Dili na gyud siya makakita sa akong presensiya sa simbahan kay dili na man ko mosimba.
Nianang pagkaudto, nag-inusara na lang ko sa balay. Milakaw dayon si Papa Segundo human kami makapaniudto. Si Mama Betty misunod sab paglakaw ni Papa. Aron pagpukaw sa kalaay sa pag-inusara, mitan-aw kog salida sa telebisyon.
Wala madugay sa akong pagtan-aw, may nanuktok sa pultahan. Mitindog ko ug giablihan ang pultahan aron pagsusi kun kinsa ang didto sa gawas. Si Rodney diay! Misulod dayon siya dihang naabli na ang sera sa pultahan.
“Nganong nia ka?” Gipangutana ko siya.
“Nasayod kong nanglakaw ang imong Papa ug Mama maong mianhi ko,” ni Rodney pa. “Maayo kay wa sila. Makalugar ta karon.”
“Nagdanghag lang nang dagway mo. Di pa mahimo, uy. Wa pa mahuman ang akong regla, busa pagpuyo diha.”
“Ah, siyaro na man sab. Ikapila na ba ron ka adlaw?”
“Ikaunom na. Pero naa pay mogawas panagsa. Dili na hinuon daghan.”
“Puyde na tingali na. Sige na kay kasawsawon na kaayo ko.”
“Madaot pa lang unya hinuon ta.”
“Dili lagi.”
Unya kalit lang kaayong mikupog paghalok si Rodney kanako. -- Sumpayan pa