Dugos ni Eva

Wala ko motingog. Gibati ko ang tumang kabakikaw samtang naglingkod sa atubangan ni Padre Dick. Gilainan ko sa iyang mga pangutana. Morag dili siya usa ka pari nga nakigsulti nako. Gusto kong matapos na among panagsulti aron makabiya na ako sa kombento. Miduko ko dihang gitutokan ko sa pari.

"Ikaw, Eva," sa pari pa nga mipitikpitik sa higot sa akong bra nga nadayag dapit sa akong abaga kay sleeveless man ang blouse nga akong gisul-ob. "Di ka ba gustong makig-date nako?"

"Di ba gidili man ninyong mga pari ang pagpakig-date?" Wala tuyoa nga nakapangahas ko sa pagpangutana kaniya.

"Kinsay nag-ingon nga gidid-an ming mga pari sa pagpakig-date? Gusto ko nga atong suwayan? Mag-date ta."

"Dili ko."

"Ngano man? Di ka gustong makasuway sa pagpakig-date og pari?"

"Basta lang, dili ko. Di ko makig-date og laing lalaki gawas sa akong boyfriend."

Mikatawa si Padre Dick sa akong gisulti. Nagpadayon gihapon siya sa pagpitikpitik sa higot sa akong bra. Gipangilogan ko. Nanglimbawot ang akong balhibo.

"K-kun wa ka nay laing tuyo nako, Padre, mopauli na ko."

"Ikaw ang mag-igo. Pero paaboton ko ang imong presensiya sa simbahan sa sunod Domingo. Okey?''

"Dili ko maneguro. Pero paninguhaon ko."

Human sa among panagsulti, mibiya ko sa kombento. Mipauli ko sa amo. Sa hilom nanumpa ko nga dili na gyod mosimba. Demonyo man diay ang pari nga nadestino sa among parokya. – Sumpayan pa