Ang sinako nga uling

Alas dos pa sa kaadlawon. Migikan na sa bukiran sa Balamban ang trak de  karga nga gimaneho ni Kikong. Nagpuay kini sa kapuno sa mga sinakong uling.

Kalma kaayo ang naasoy'ng trak nga milatas paghinubay sa dalan sa Lutopan. Sa kiliran ni Kikong nahikatulog nga nagsandig sa lingkoranan ang iyang agalon nga si Mr. Elias Arcanghel.

Uling lang ang negosyo ni Mr. Arcanghel. Apan sa duha lamang ka tuig nga pagpadagan niya sa maong negosyo, nabantog si Mr. Arcangel nga labing sapian sa ilang dapit. Nakapalit na siya og mahalong kotse. Nakapapanday nag matahom pinuy-anan, ug nailhan siyang usa sa mga dagkong puntos sa bulangan, diin, didto si Kikong miduol kaniya ug mihangyo nga mosulod sa pagka-drayber sa iyang mga sakyanan.

Ang kaligdong ug pagka-kasaligan sa bayhon ni Kikong nakadani pag-ayo ni Mr. Arcanghel, maong iya kining gidawat. Ug misamot pa gyod ang pagsalig ni Mr. Arcanghel kang Kikong gumikan sa daghan niining nahibaw-an nga trabaho, sama sa electrical, carpentry, ug makamao pa gayong moayo sa mga trobol sa makina sa iyang mga sakyanan. Sanglit bisan bag-o pa si Kikong sa iyang mga kamot, gipiyal na niya kaniya ang pagkontak sa mga mangunguling sa bukid sa Balamban. Gihatagan pa gyod niya og katungod sa pagsusi sa mga sako nga gisudlan sa mga uling. Dili usab siya maulaw nga mosugo ni Kikong bisan sa pagpakig-atubang sa iyang mga suki sa siyudad, kay gawas nga makamao, ambongan siya ug dili hibintahaan ang pamarog.

Misamot pagkalma ang dagan ni Kikong paghitugsad niya sa lungsod sa Naga. Ug paghiabot nila sa Police Outpost sa Bulacao, alerto nga naglinya sa paglaray ang mga polis, kansang tuong kamot gitapion sa ilang agtang agi og pagpaila ug pagtahod ni Kikong nga mipahigayon sa pagpahunong sa sakyanan. Ug uban sa pagkanaog ni Kikong, iyang gikuptan sa pagbunlot si Mr. Arcanghel gikan sa iyang gilingkoran nga nakapahingangha sa kahadlok si Mr. Arcanghel.

"K-Kong!" milugnot unta si Mr. Arcanghel, apan...

"Ayaw pakitag pagsukol, Mr. Arcanghel, aron dili mamiligro ang imong kinabuhi!" gipaigot ang maisogong tingog ni Major Kirk de Gracia,ang tinuod nga ngalan, kinabuhi ug pagkatawo ni Kikong.

Ug dihadiha, milanog ang laing pamahayag ni Medyor de Gracia (Kikong) ngadto sa mga polis, nga nagkanayon:

"Mga kauban, ania na sa atong mga kamot ang tag-iya sa daghanang marijuana plantation sa bukid sa Balamban. Karon dayon dad-on nato siya sa opisina sa Cebu Narcotics Command, ug didto usab nato idiskarga kining mga sinakong uling nga giundan sa binandol nga dahon sa marijuana!" – Kataposan