Usahay makabughat ang isdang til-ogon

Dili matukib sa pulong ang kalipay nga nakigminyo si Porlita, kang Roming, nga usa lang ka yano nga mananagat. Kinsa man tuod nga asawaha ... nga dili pa gani mosilang ang adlaw .. mahiuli na ang iyang bana nga magkinagang og alsa sa bukag nga hapit na lang nga mahimabaw sa nagkadaiyang isdang til-ogon.

"Belib gayod ko nimo Roming, nga bisan maglain ang panahon anaa gihapon modawi sa imong pasol sa mga isdang til-ogon nga paborito ko kaayo nga tuwaon!" hupong sa kadasig ang tuno sa sinultihan ni Porlita sa panahon mahiabot na ang iyang bana gikan  nga namasol.

"Gibuligan gihapon kitang duha sa kahitas-an ... Porlita nga sa kabag-ohay pa nato nga nanagtipon, isip magtiayon wa kita makasinati sa kapait sa atong panud-an," nagpamisik ang laway ni Roming nga mapahiyomon nga mitubag sa iyang asawa nga niadtong higayona nagpangamay sa bana nga pasudlon sa ilang gamay nga sibay.

"Unahon ko una Porlita, sa pag-asikaso ning akong kuha nga isda nga pulos til-ogon aron akong matuwa," namalibad una si Roming sa iyang asawa. Ang tinuod nakasabot na siya unsa kadtong gisinyas kaniya sa iyang asawa. Sa iyang hunahuna ... asa ra man tuod kanang butanga. Sayo god siya nga migikan sa dagat aron mamasol. Kutoy na kaayo ang iyang tiyan ug magkalipong na gani siya nga molakaw padulong sa kosina.

"Ayaw gayod unya pagmahay kanako Roming, kon ikaw na mismo ang manghagad," dihay sagol tuno sa pagmahay ang iyang asawa.

Ning ila god nga balangay sa Pitalo, kasagaran sa mga tawo nga ilang silingan ning daplin sa baybayon, pulos gayod mananagat.

"Kay dili ka man gayod pabalibad ... unahon ta una kanang gipamarayeg mo kanako ... Porlita!" dihay sagol kontra gusto sa tuno sa sinultihan ni Roming nga giagbayan ang asawa ngadto sa ilang sibay.

Ang nagbuy-od nga kahilom ... gitugaw usahay sa panagsang inudhak nga may sagol inagunto sa duha nila ka tingog, nga gisagolan sa makatakod nga kinagiki.

Gilayon, miadto sa kosina si Roming, aron tuwaon ang kuha niyang isda nga til-ogon. Namituon ang inalisngaw sa kainit sa sabaw nga gisulod sa panaksan ni Roming aron pahigopon ang iyang asawa nga niadtong higayona nagtikangkang pa sa paghigda sa sawog nilang kawayan.

Giabot og dili tiaw nga kahibulong ang iyang bana nga mibalibad si Porlita nga nagkanayon:

"Usahay ... makabughat ... ang isdang til-ogon ... kon palabihan!" – Kataposan