May utlanan ang kangitngit

Wala ko makatingog. Nakalitan ko sa gisulti ni Reuben. Wala ko magdahom nga mopadayag siya sa iyang gibati ngari kanako. Komedya lang kaha ang iya?

"I love you, Kaycee," matud na usab ni Reuben. "I love you very much."

"I-I'm sorry, Reuben," mikurog ang akong tingog. "Pero dili ko makahimo pagdawat sa imong gugma."

"Sa unsang hinungdan?"

"Maglisod kog pasabot nimo."

"Tungod ba kay wala kay pagbati ngari nako? O tungod kay nahadlok ka sa imong parents? Husto ba ko, Kaycee?"

Wala ko motingog. Miduko ko ug naghunahuna.

"Tug-ani ko sa tinuod nga hinungdan, Kaycee," gikan ni Reuben.

Wala gihapon ko motingog. Gikuligaw ang akong hunahuna sa kalibog.

"Kun bahin sa imong mga ginikanan ang hinungdan nga dili ka makadawat sa akong gugma," ni Reuben pa, "wa kay angay kabalak-an. Mahimong itago nato ngadto kanila ang atong relasyon. Mag-amping ta nga dili nila hisabtan ang atong mga lihok."

"Hatagi una kog higayon sa paghunahuna niining tanan," matud ko.

"Okey," ni Reuben pa. "Magpaabot ko sa imong hukom."

Nianang pagkagabii, wala dayon ko makatulog. Lawom nang gabii ug mingaw na ang palibot apan nagpabiling nagpitokpitok ang akong mga mata. Nag-alindasay ko sa akong higdaanan. Maoy akong gihunahuna ang gipanagsultihan namo ni Reuben.

Hipokrita ko kun dili nako angkonon nga may pagbati usab ako alang kang Reuben. Na-crush man gani ko dayon niya sa una kong pagkakita kaniya. Pero kun paundayonan ko ang akong gibati, dili kaha ko makabaton og problema sa kapulihay? Basin masayran sa akong mga ginikanan nga nakigrelasyon ko kang Reuben. Unsa man kaha unyay mahitabo? Mao kini ang akong gikabalak-an pag-ayo.

Kaadlawon na dihang nakapakanaog ako og desisyon. Mihukom ako sa pagpamahala. Mao nga dihang nagkakita kami pag-usab si Reuben sulod sa usa ka department store, gidawat ko na ang iyang gugma. – Sumpayan pa