Si Mama Clara ug ako

Sayo sa buntag. Gibati ko pa ang kalami sa katulugon. Apan si Mama Clara mapugsanon nga mipukaw nako sa akong kuwarto.

"Unsa ba, Nilda? Kagahi nimog ulo! Pagmata na aron maligo og moadto sa eskuylahan!"

"Si mama sad, uy! Sayo pa kaayo!" Nanglugod ko sa akong mga mata nga mibangon ug milingkod sa ngilit sa akong kama.

"Unsay sayo? Pag-anad pagmatag sayo kay nag-eskuyla ka na!"

Ingon niini si Mama Clara dihang nagsugod na kog tungha sa primarya wa ko kasabot niya. Kanunay kong kasab-an kun magdugay-dugay kog mata. Duha ra man unta kaming magsuon ug ako ang kamanghoran. Pinangga unta ko niya kon buot hunahunaon. Apan may panahon nga bunalan ko niya kon di ko siya paundayonan sa iyang gusto nga mag-anad kog matag sayo panahon sa tingklase. Makakaon gyod kog grabeng kasaba gikan kaniya.

Milabay ang mga tuig. Way kausaban ang pagtratar ni Mama Clara nako panahon sa tingklase. Pamat-on gyod ko niyag sayo. Kanunay kong kasab-an. Mao sab ang akong igsuon. Ingon sad niini ang iyang pagtratar sa akong maguwang.

Nagtungha na ko sa hayiskol. Si Mama Clara gihapon ang nagkontrolar sa oras sa akong pag-adto sa eskuylahan mabuntag. Usahay gusto na kong motubag ug mosukol kaniya. Hapit di na ko kaantos sa iyang kaistrikta sa akong pag-eskuyla. Apan si Papa Mario kanunay nagtambag nako.

"Pasensiyahi na lang ninyo ang inyong mama. Ingon gyod siya niini."

"Apan sobra na ang iya, pa."

Mitan-aw ko sa akong magulang nga nagmug-ot ang nawong.

"Bitaw, Pa. Isog siya kanunay,"matud ko usab.

Nagpadayon ang maong kinaiya ni Mama Clara. Hinuon, maayo siyang moatiman namong managsuon, labi na bahin sa pagkaon. Matag gabii paimnon gyod kamig gatas. Wa mi katabang bisan maayo ug dakog suweldo si Papa Mario sa gitrabahoang opisina. Si Mama Clara ang nag-atiman sa among balay. Siya sad ang manglaba ug magluto.

Usa ka gabii, migawas ko sa akong kuwarto kay naglain ang akong tiyan, duol sa among kosina ang CR. Hayag pa ang among sala. Wa pa diay manulod sila si papa ug mama sa ilang kuwarto. Nadungog ko ang ilang gipanagsultihan. Wa sila makamatikod nako.

"Di kaha sobra ra ang imong pagkontrol sa pagtungha sa atong mga anak, Clara?"

"Naluoy ko nila, Mario. Nasayod ka nga gimahal ko sila. Apan nasayod ka sa hinungdan nga istrikta kaayo ko sa ilang pag-eskuyla. Wa ko kahuman bisan sa hayiskol tungod kay wa koy interes sa pag-eskuyla.Ug ang akong mga ginikanan mipaundayon lang sab sa akong gusto."

"Aw, husto man sab nuon nang imo."

"Kun nagpakita pag interes ang akong mga ginikanan sa akong pag-eskuyla, kun ila pa gyod kong gipugos sa pagpatungha, nakahuman unta kog kurso karon."

"Milabay na kadto, Clara. Kalimti na kadto. May mga ginikanan man gyod nga ingon niana. Maulahi ang pagbasol. Aw, wa man nuoy pagbasol nga mag-una."

"Mao nga istrikta kaayo ko sa pagpaeskuyla sa duha nato ka mga anak, Mario. Gusto ko nga magbaton silag dakong interes sa pagtungha aron makahuman silag kurso."

Unya, nanulod ang akong mga ginikanan sa ilang kuwarto. Kalit nga nahanaw ang kahiubos ko kang Mama Clara tungod sa akong nadungog kaniya. Hisabtan ko na siya nganong istrikta kaayo sa akong pag-eskuyla ingon man ngadto sa akong igsuon. – Kataposan