May utlanan ang kangitngit

(Gula 2)

Nagtungha na ako sa ikaupat nga ang-ang sa kolehiyo sa kursong nursing dihang may boarder nga lalaki nga miabang og kuwarto sa among balay. Siya si Reuben. Sa akong nasayran, taga Negros og kagikan si Reuben. Nagtungha siya sa usa ka unibersidad sa Sugbu sa kursong information technology. Gusto siyag privacy mao nga entirong kuwarto ang iyang giokupar sa pag-abang. Lahi sa uban namong boarders nga nag-bed spacer lang kay walay ikaabot pag-abang sa tibuok kuwarto.

Sa hilom, na-crush ko kang Reuben. Ambongan man god siya nga pagka lalaki. Kusog og sex appeal. Alang nako, aduna siyay charisma nga kusog maka-attract sa mga babaye. Mora siyag si Pierce Brosnan, ang ikalimang aktor nga midala sa papel ni James Bond 007. Aduna siyay charm nga lisod kaayong ibale-wala.

Mi-admire ko sa kaguwapo ni Reuben. Sa hilom nakagusto ko niya. Pero nag-amping kong dili hisabtan sa akong mga ginikanan nga may pagbati akong gitagoan alang kang Reuben. Estrikto ra ba sila kaayo. Seguradong masuko gyud sila nako.

Sulod sa balay, gipaninguha ko nga dili kami magkaduol si Reuben. Kun dili gayod kalikayan nga magkaduol kami, dili ko siya pakitaan og maayong pagtagad ilabi na kun anaa ang akong mga ginikanan. Nag-amping kog maayo sa akong mga lihok. Si Reuben sab ingon sa nakasabot sa kahigpitan sa akong parents. Maglikay sab siya sa pagpakigsulti nako kun anaa sila si Papa Amado ug Mama Marlinda.

Apan kun magkita kami sa gawas sa balay, maayo ang pagtinagdanay namo ni Reuben. Bisan managlahi ang unibersidad nga among gitunghaan apan may mga higayon nga magkakita kami sa mga mall. Sama sa nahitabo usa niana ka higayon samtang namili ko og pocketbooks nga paliton sulod sa National Bookstore sa may Mango Square. Nakugang ko dihang may mikuhit sa akong bukton gikan sa akong luyo samtang nagbasabasa ko. Si Reuben diay. Nagkatawa siya sa akong paglingi ug wala lang tuyoa nga nagkasugat ang among mga mata.

“Hi!” Mitimbaya siya kanako.

“Hello!” mibalos ko pagtimbaya.

Unya kalit lang mikuba ang akong dughan dihang iya kong gitutokan. -- Sumpayan pa