Na-korner ang maidlas

Bag-ohay pa lang miabot si Ferdinand gikan sa kaulohan diin siya nagtrabaho isip piskador sa lantsa. Matuman na gayod ang iyang saad kang Arceli, ang iyang hinigugmang nagmaunongong nagpaabot og duha ka tuig gikan sa iyang pagbiya sa ilang dapit sa baryo Katipunan.

Midangat og usa ka semana, mao pay pagkasayod ni Arceli nga si Ferdinand nahauli. Nasurpresa ang dalaga og nganong wala gilayon makigkita kaniya si Ferdinand sa tukmang adlaw sa iyang pag-abot sa Katipunan.

Apan nahibutho gayod si Ferdinand, usa ka gabii niana, sa panimalay ni Arceli. Naatol nga diha ang mga ginikanan ni Arceli sa balay. Miabiabi sila kaniya. Mihangop sa kalipay si Arceli tungod sa dugay'ng panahon nga wala na sila magkita.

"Karon, nga nia ka na, Ferdinand, manghinaot ko nga imong tumanon ang gisaad nimo nga magpakasal ta," nagkanayon si Arceli.

"Gikasubo ko, Arceli, nga di nako matuman karon ang akong gisaad kanimo tungod kay wa koy ikatampa kanimo kun ako mangatubang sa imong ginikanan.

"Ang tinuod mao  nga nahurot ang akong kuwarta nga gitagana kanimo tungod kay nagamit kini sa emerhensiya sa dihang nagkasakit ang akong amahan. Busa sa sunod tuig na lang," pasabot ni Ferdinand.

"Kun tinuod na, Ferdinand, wa koy mahimo, magpaabot na lang ko," ni Arceli.

Wala magdugay ang ilang panag-estoryahay. Pugos lang gidawat ni Arceli ang pakiluoy ni Ferdinand. Mipauli dayon si Ferdinand.

Pagkabuntag, nangusisa si Nong Fausto bahin nila ni Ferdinand ug Arceli.

"Nahingpit na ba ang inyong plano pagminyo? nagkanayon si Nong Fausto.

"Wa pa tay, may dakong problema si Ferdinand," ni  Arceli.

"Klaroha na, kay basin momabdos ka lang nga way bana, ayaw pagpakamartir, paneguro hinuon sa imong kaugmaon kay tigulang na mi, Arceli. Kamong mga babaye ra ba, sumbonganan sa bakak," ni Nong Fausto.

Sa gihimangno ni Nong Fausto, nabuka ang salabotan ni Arceli. Nagmagul-anon siya. Nahadlok siyang makakaplag og laing babaye si Ferdinand. Ang nakapait kay dili ma-monitor ang binuhatan ni Ferdinand matag adlaw tungod kay managlagyo man ang ilang gipuy-an. Gikatugyan na ra ba niya ni Ferdinand ang iyang pagkababaye sa wala pa kini moadto sa kaulohan. Labaw sa tanan, nahadlok siyang ipanabi sa mga tawo nga pusgay na ang iyang kaputli.

Usang semana, gikan sa pagpamisita ni Ferdinand. Nagmalaumon si Arceli nga bisitahan pa kini ni Ferdinand. Hangtod miabot na  lang ang usa ka bulan.

Sa nadugay nang pagpaabot midesider si Arceli nga moadto sa pinuy-anan ni Ferdinand. Buot niyang sidsidon ang nahiagoman sa amahan ni Ferdinand. Apan nakugang si Arceli. Iyang nasayran nga gibakakan diay siya ni Ferdinand. Dili diay tinuod nga nasakit  ang amahan niini. Nasayran pa gyod niya nga may laing babaye sa kinabuhi ni Ferdinand.

Usa ka gabii niana, namisita si Ferdinand kang Arceli.Naatol nga wala ang ginikanan ni Arceli. Wala na makasukmat si Arceli kang Ferdinand sa iyang nasayran nga binuhatan niini tungod kay gigakos siya. Naanod sila sa kahinam ug nahikalimot sa nangaging kagul-anan.

Pipila ka oras, kalit miabot ang ginikanan ni Arceli. Mitimbakuwang ang duha. Hisakpan ang kaidlas ni Ferdinand. Gikaatubang niya si Nong Fausto.

"Arceli ug Ferdinand, mga buysit kamo! Buhat sa minyo ang inyong gipakita kanako! Ferdinand, di ko makatugot nga imong layasan pag-usab ang akong pinanggang anak. Maayo ka rang manayming ha, mora kag irong sungkaban. Kinahanglan pakaslan mo ang akong anak!" matud ni Nong Fausto sa tumang kalagot.

Gikatampa na gayod ni Ferdinand ang iyang kinitaan alang sa gastohan sa kasal. Napugos siya pagpakasal ni Arceli tungod kay na-korner man siya. – Kataposan