Gula 76
Nagpadayon ang pinusilay. Usa batok sa daghang mga sakop ni Cong. Temistocles Geligao. Apan tungod sa kaabtik ni Rey Corpuz, naanam-anam niyag puo ang mga batabata sa kongresista. Hangtod nga ingon sa nawad-an silag kaisog sa pagpakigsangka kaniya. Apan wala sila hatagig higayon ni Rey nga makaikyas.
“Brat-tat-tat-tat-tat! Gipusil ni Rey ang kutob sa kaaway nga iyang makita nga buot mosulod sa balay. Ang uban buot modagan paingon sa luyo sa balay apan naapsan sila sa mga bala sa gigunitan niyang armas nga taas og kalibre. Hangtod nga nahurot niyag patay ang mga sakop sa kongresista.
Misulod siya sa balay aron pagpangita kang Cong. Geligao. Apan gisugat siyag butobuto. Gipusil siya sa Congressman. Maayo gani kay abtik siyang nakahapa sa salog. Ug dihang nakahigayon, gipusil niya ang kamot sa congressman nga naggunit og armas. Naigo niya kini ug nahisalibay ang armas nga gigunitan niini. Naningkamot pagdagan ang congressman paingon sa kosina apan iyang gipusil ang tuong paa niini. Natumba si Cong. Geligao nga nagping-it sa kasakit.
“A-ayaw ko patya,” nagpakiluoy ang kongresista sa dihang mihinay nag paduol si Rey sa nahimutangan niini. “M-maluoy ka...!”
“Dili ko ikaw patyon, Cong. Geligao,” nagkanayon si Rey nga nagbarog na sa tiilan sa congressman. “Apan taralon ko ikaw sa hukmanan aron tubagon ang imong atraso sa katawhan. Nagpakauwaw ka lang sa imong pagkatawo. Pinili ka man unta sa katawhan apan maoy imong gipalabi ang imong kahakog. Giamong mo pa ang Visayas Pacific Laboratories sa imong kabuang.”
“Wala ko masayod nianang imong gipanulti,” sa kongresista pa.
“Ayaw na lang pagpangulipas, Congressman,” ni Rey pa. “May gikuptan na kong lig-ong mga ebidensiya batok kanimo.”
“K-kinsa ka ba?” Sukit sa kongresista. “N-nganong giingon mo ako niini?”
“Ako si Rey,” paila ni Agent 11-M. “Rey Corpuz.”
Dayon giposasan niya si Cong. Geligao. -- Kataposan