Kadtong babaye nga mikumpisal kanako

Supak ba sa kabubut-on sa atong Ginoo,  kalit lang nasud-ipan og laway ang maong babaye nga ingon sa naghilak, nga kalit lang nahunong sa iyang pagkumpisal kanako.

"Gumikan god sa tinuyo kong pakigbuwag kaniya ... nakahukom na lang siya sa pagsulod sa seminaryo aron mag-pari!"

Ingon ako sa nahimut-okan sa gipamulong sa maong babaye kay sukad god nga gi-ordenahan ako sa pagka-pari diin ako gidestino ning maong lungsod sa San Mateo, sulod sa usa na ka tuig nga milabay, karon pa man ako makasugat ning maong klase nga mokumpisalay nga personal ra kaayo nga paminawon?

"Ngano man sad Inday ... nga imo man nga gibuwagan nga unta hugot na man kaayo ang inyong pagminahalay nga moatubang sa altar sa kaminyoon?" mipagawas ako og ligdong nga pangutana.

"Nanumpa man god Padre sa akong atubangan ang iyang ginikanan ... nga kon magtuman kaming duha sa among kagustohan ...isakripisyo nilang magtiayon nga magpakamatay kay lagi bugtong man nila kadtong maong lalaki nga anak!" hapsay kaayo paminawon ang gikumpisal kanako sa maong babaye nga niadtong higayona ... wa gayod molurang ang kalanog sa iyang mga bakho.

"Unya ... unsa may nahitabo sa maong lalaki nga imong hinigugma? Natapos ba gayod niya ang iyang bokasyon sa pagka-pari?" dihay kaluming sa akong tingog nga nagpakisayod sa maong babaye.

"Ania na man gani siya mag-kura paroko dinhi sa maong simbahan sa San Mateo?" way lipod-lipod nga mipadayag kanako ang maong babaye nga mihunong na sa paghilak.

Ambot ug ngano nga gipaningot na man hinuon og maayo ang akong tingkoy sa kabugnaw sa singot. Gipangulbaan na hinuon ako? Susama man god kini sa tinuod kong kaagi samtang didto pa kini mahitabo kanako sa dakbayan sa Surigao, diin maayo na kaayo pagkalig-on ang duha namo ka gugma ni Lisapera?

"Kay nadimdiman na man natong duha ... Bartolo, ang pagyarok sa kopa sa himaya ... andam ka ba nga magpakasal kanako?" kausa gisukot ako ni Lisapera.

"Atubangon ko ang akong kaakohan ... akong mahal nga Lisapera nga magpakasal kanimo!" dihay kalimbationon sa akong mga panumpa ngadto sa maong babaye.

Baligho sa panahon wa ko damha. Supak ang kabubut-on sa akong mga ginikanan nga magpakasal kang Lisapera nga anak lang sa among saop.

Migawas ako gikan sa kumpisalan  ug maoy akong nakita nga migakos kanako og kalit si Lisapera nga nagkanayon:

"Wa gihapon mahanaw bisan usa ka na kasulugoon sa Dios, ang akong paghigugma kanimo ... Padre Bartolo!" – Kataposan