Gabii na, Rey Corpuz!

(Gula 71)

Wala pa gani makaisyu ang korte og warrant of arrest alang kang Cong. Temistocles Geligao, nasayran ni Rey Corpuz nga nakasibat na ang kongresista. Ang naghatag kang Rey sa maong kasayoran mao mismo si Loida, ang anak ni Cong. Geligao.

“Wala ko masayod kun hain na karon si Daddy,” nagkanayon si Loida. “Basta kay iya kong gitugon nga kun dunay mangutana kun hain siya, pulos ambot ang akong itubag. Kay ang tinuod, wala man gyud siya motug-an kun asa siya paingon. Basta kay gidala niya ang tanan niyang mga bata-bata.”

“Diay ba?” Mao ray nasulti ni Rey.

“Kay ngano man diay, Rey?”

“Wa man. Kuan...nasayod ka na ba sa balita bahin sa imong amahan?”

“Oo. Gani, gipangutana ko man siya kun tinuod ba ang maong isyu. Wala ko niya tubaga. Nasuko hinuon.”

Human makigkita kang Loida, si Althea na usab ang gipakigkitaan ni Rey. Gipahibalo niya kini nga nakasibat na si Cong. Geligao.

“Apan may gidudahan na kong dapit nga maoy gitagoan karon ni Cong. Geligao,” nagkanayon si Rey.

“U-unsa?” Mikunot ang agtang ni Althea.

“Nagtuo ko nga tua siya sa isla sa Canraza. Sumala sa kasayoran nga akong nahipos, magkanunayan sa maong isla si Cong. Geligao tungod kay napalit na niya ang kapin sa katunga sa maong isla. Posibleng atua siya didto magtago karon.”

“Nan, unsa may imong plano karon?”

“Moadto ko sa isla sa Canraza aron pagdakop sa kongresista.”

“Labing maayo tingali nga magpakuyog ka sa taga CIDG.”

“Mag-inusara lang ko, Althea. Ang taga CIDG dili makahimo pagdakop kang Cong. Geligao samtang wala pa siya’y warrant of arrest. Apan naggunit kog lig-ong ebidensiya nga igo nang kapasikaran sa pagdakop ko kaniya. Busa mag-inusara kong moadto sa isla sa Canraza.” — Sumpayan pa