Dugos ni Eva

(Gula 52)

Nagkasugat kami si Noy Tonyo nga mao  pay paggawas sa gate sa koral sa among balay. Nagpahiyom siyang nagtan-aw nako.

“Kumosta, Inday?” Mitimbaya siya.

“Maayo man, Noy,” laktod kong tubag.

“Gikan ko sa inyo. May tuyo unta ko sa imong Papa apan wala man diay siya sa inyo. Nagsulti nako ang imong Mama nga milakaw ka aron pagpangita sa imong Papa.”

“Tinuod kana, Noy. Pero wala nako makit-i si Papa. Ambot kun hain gyud siya.”

“Sige, Day, mopauli na lang ko. Mobalik lang tingali ko ugma sa buntag.”

Wala na lang ko mangutikuti kun unsay tuyo ni Noy Tonyo kang Papa Segundo. Sa tanan namong mga silingan, si Noy Tonyo maoy labing suod sa akong amahan ingon man sa akong inahan. Mao lagi nga nagkasuod pod kami si Rodney sukad sa mga bata pa kami...hangtod nga nagkahigugmaay. Ang ilang balay giuwang lang sa usa ka bakanteng lote gikan sa among balay.

Misulod ko sa balay dihang layo na si Noy Tonyo. Gipahibalo ko si Mama nga wala gyud nako makit-i si Papa. Apan wala magpalibak ang akong amahan. Nahiabot kini pagkataudtaod nga nagsusapinday sa kahubog. Didto diay siya sa balay sa usa ka konsehal sa among lungsod nga iyang kompare kay maoy nangugos sa pagbunyag nako. Nag-inom sila maong nahubog si Papa. Igo lang nagpanglingo si Mama.

Nianang pagkaugma, nakahigayon si Rodney sa pagpakigsulti nako sa among eskuylahan. May gihangyo siya nako. – Sumpayan pa