Virgin breaker si Timyong

Pilit na pud kaayo’g hinapay si Timyong kuyog sa bag-o niyang hinigugma. Malipayon  kaayo ang duha nga nag-agbayay ug dikit kaayo ang mga ngabil niini. Bag-ohay pa  lang niya nakaila ang maong babaye apan kadali ra niya nasuod pag-ayo. Ambot kun naa ba kahay anting-anting kini si Timyong kay kadali ra man niya makuha ang pagtagad sa mga maanyag ug seksing kadalagahan.

Naka panglingo-lingo na lang gud kong nagtan-aw nila. Sa akong hunahuna mabiktima na sab niya ang bag-o niyang hinigugma. Dili  man tuod guwapo si  Timyong apan hait man kaayo’g mga diskarte. Labaw pag abogado kung pasultion. Walay kahadlok nga mopasalig sa kababayen-an nga iyang pangulitawhan.

“Kun sugton lang ko nimo, Dolor, dili ko gyud ikaw pasakitan. Pakasamahon ko ikaw’ng bathala sa akong kinabuhi,” matud pa ni Timyong nga ligdong kaayong tan-awon, mora’g kasaligan gyud kaayo’g nawong.”

“Tinuod ka Timyong?  Basin baya ha kun igo ka lang sa pasalig,unya wala sa buhat,” hagawhaw lang ang tingog sa dalaga.

“Tinuod lagi kana Dolor, wala ko magtiaw! Pakasamahon ko gyud ikaw nga rayna sa atong panimalay kun kita na gyud ang magkadayon,” dugang pa niyang pasalig ngadto sa dalaga. Suhito man gud ko ani ni Timyong kay suod ko man kini siyang amigo sa una, apan naguba lang ang among relasyon isip suod nga managhigala sa dihang giilog niya gikan nako ang akong hinigugma.

Daghan na kaayo siya’g na “virginan” sa among dapit. Gitawag na gud ni siya og “Virgin breaker” hasta gud ang akong uyab, na “virginan” sab.

Sa kami pa sa kanhi kong hinigugma kaniadto, igo ra gyud tawn kong makahalok, hikap-hikap ug gunit-gunit gamay sa kamot. Ug sa wala damha, sa daklit lang nga nawagtang ko’g kadali sa amoa kay niadto ko sa kong ig-agaw sa Bohol. Mao na man lang ang akong nabalitaan nga  nabuak na diay ang pakwan sa uyab kong kundatan. Samot na ang kasakit sa akong dughan sa  dihang akong nahibaw-an nga si Timyong diay ang nakapangahas pagtaak sa lungag sa lubnganan sa patay’ng buhi sa kanhi kong hinigugma. Dugay-dugay gyud kong nag-antos sa kasakit sa akong balatian, wala dayon maalim ang samaran kong dughan. Igo ko nalang siyang gipanghinaot. Nakahibalo ko nga may adlaw ra nga iya kining pagabasulan. Unya niabot gyud ang panahon nga nagapos ang kaidlas niya ngadto sa mga babaye kay nasakpan man sa akto sa ginikanan sa dalaga nga nag-romansa sulod sa kaugalingong panimalay sa babaye.

Giibtan man og pinuti sa amahan.

Kinahanglan nga manubag ka sa gibuhat mo sa akong anak,” masuk-anon kaayo ang amahan niini.

“Pero noy!”

“Wala nay pero-pero, kinahanglan nga pakaslan mo sa labing daling panahon,” nagwara-wara kini sa iyang sundang nga nisilaw sa kahait.

Tuod man, gipakaslan gyud niya ang babaye kay nagbunga man ang ilang gibuhat sa pagtagay sa lawasnong kalipay. Apan ang gipanaad ni Timyong nga pakasamahong rayna ang iyang maasawa, gihimo man hinuong punching bag niya. Wala abtig tuig ang ilang panag-ipon kay niuli man ang asawa niini. Wala na kaantos sa iyang kahimtang tungod kay kanunay na man lang magkutoy ang iyang tiyan kay wala may makaon sa panahon nga siya gutomon. Nakaingon gud siya.

“Mag usab pay layog, dili na gyud ko mousab. Maayo lang sa pasalig apan wala sa buhat,” pong pa sa asawa ni Timyong nga nakaamgo sa sayop niyang pagtuo nga tinuod ang mga pasalig niyang nadungog.

Si Timyong nga biniyaan na sa iyang asawa ug usa niini ka anak nagsige na lang og hinuktok, gani wala namay klaro manubag kun kini pangutan-on mura man og nalisoan sa maayong pangisip.

Seguro gaba na tingali na sa iyang gibuhat sa mga kababayen-an nga kutob sa iyang na virginan ug iyang gipasaligan nga pakaslan. Naa man gud na sa panultion nga “ang gaba dili magsaba” kun unsa gani kasakit ang imong gihimo mao usab ang ipahamtang nimo.” (Kataposan)