Nabuhi ang patay’ng mga gutlo

Tungang gabii na sa iyang paghiuli sa ilang balay. Maoy misugat kaniya ang kahaw-ang. Alang kaniya daw dulot sa bukog ang kasakit sa kamingaw nga migakos karon kaniya. Pagkamingaw ning iyang kahimtang.

Nag-inusara na lang siya kay ang iyang pinanggang asawa tua na man sa laing kalibotan, mipanaw kini sa wala nay pagbalik tungod sa usa ka kasakit nga taudtaod nang giantos niini. Giablihan dayon niya ang pultahan sa ilang lawak ug gipasiga ang sugang dagitabnon. Diha sa may tokador ang larawan ni Mina nga nagpahiyom. Pastilan kun buhi pa kini tingali malingaw gyud siya nga makighinabi niini. Istoryador ang iyang asawa  ug ganahan gyud siyang mamati sa isugilon niini kaniya.

“Mina, kun hain ka man karon ibutang sa  Ginoo, nia gihapon ning akong kasingkasing ang way kamatayon kong gugma kanimo,” niya pa sa hilom nga misud-ong sa larawan sa iyang namatay’ng asawa. “Buhi ka kanunay sa akong hunahuna.”

Gikan niadtong mga adlaw nga nag-inusara na lang si Bador, tuyoon  gyud niya ang iyang kaugalingon nga maglingawlingaw siya labi nag molunop pagkalit ang bul-og sa kamingaw ngadto sa iyang asawa nga si Mina.

Busa, ang iyang buhaton moadto siya sa mga bar, sa mga disco pub, sa mga videokihan ug magkantakanta siya. Makig-inom siya sa iyang mga higala. Kun dunay moimbitar kaniya’g pangaligo dili niya kini balibaran sa tuyo nga malingaw siya. Unsa man say sayohan niya’g pauli sa ilang balay nga mingaw man inig-abot niya didto?

Karon, nia na sab siya sa usa ka baybayon — sa usa ka inilang beach resort kuyog sa iyang mga kauban sa opisina. Dinhi wala tuyoang may nasigpatan siya. Usa ka babaye nga naglakaw sa baybayon. Bisan layo kini kaniya, iyang natantiya nga matahom kining bayhana. Nagsul-ob kini’g short ug puti nga t-shirt. Pinadunghay  ang buhok niini. Wala makaagwanta si Bador sa iyang nakita. Mibiya siya gikan sa tapok sa iyang mga kauban ug giduol ang babaye.

“Cora... tawga lang ko’g Cora... Corazon Bandillo,” sa babaye  pa nga nagpahiyom dihang gipaila niini ang iyang kaugalingon. Gipaila pud ni Bador ang iyang kaugalingon. Ug dinhi magsugod ang ilang panagsuod. Ug dinhi nasayran usab diay ni Bador nga biyuda kini kay bag-ohay pang namatay ang bana niini.

“Parehas ta, Cora, kanunay tang gisungog sa kamingaw,” hinay sulti ni Bador dihang nagkuyog sila usa ka hapon niana. “Apan unsaon ko pagbuntog niini, tawo lamang ako...”

“Ako hinuon, ako nang gitun-an ang akong kaugalingon nga wala na ang akong bana, nga ang tanan ning kalibotan may katapusan,” kalma ang tingod ni Cora. “Nadala ra man nako...”

Usa ka gabii samtang nag-inusara si Bador sa ilang balay ug unya nagkalingaw siya’g pamati sa awit ni Perry Como nga iyang gipatugtog sa ilang stereo component, may nangayog katahoran didto sa silong. Midali siya’g lakaw paingon sa pantawan. Unya diha ang binuhat nga sa hilom iyang gimahal bisan sa una pa lang nilang panagkita didto sa baybayon.

“Cora, nakatultol ka man lagi sa akong balay,” pahiyom ni Bador. “Dayon... dayon diri...”

Midayon si Cora. Unya dugay ang ilang panagkabildohay. Ug may gisumbong ang biyuda kaniya. “Dor, mabuhi pa kaha ang patay kong mga gutlo?”

Mitutok si Bador kang Cora. Ang awit ni Perry Como nga From Moment to Moment mianam ka tataw nga maoy mihatag og bulok sa ilang panagkita karon. Unya hinay usab nga mitubag si Bador. “Cora, puwerte gyung usaba sa tanan, kay sa dihang miabot ka kanako, nabuhi ang patay kong mga gutlo.” (Kataposan)