Ang habuhabo sa ting-init

Bag-o lang mihugpa ang kangitngit. Ang pino sama sa lanot nga habuhabo nga dala sa apyogong huros sa hangin nakadugang hinuon sa kaalindanga sa panahon. Kini gumikan sa pag-alisngaw  sa kainit sa sementadong dalan nga naalang-alang sa pagkabasa. Kini maoy unang paghabuhabo sa taas nga lanat sa hulaw. Sukad pa sa miaging bulan sa Marso misugod paghunat ang ting-init. Misamot kini niining nagsingabot nga semana santa.

Ang kaigang sa panahon nakadugang paghaling sa nag-alintabong galamhan ni Daniel. Bisan dili pa siya dugay nga nahigawas sa banyo ug nag-umog pa ang buhok, namutlog sa iyang agtang ang singot. Gipaduwas niya kini sa iyang  palad. Giduot niya ang gamay nga electric fan nga gipatong sa lamesa aron kini motuyok. Dili siya gusto nga panington nga mag-ilis.

May lakaw si Daniel busa kinahanglan nga presko siya ug humot. Mobisita siya kang Nymia nga kapin pa  lang sa bulan nga nahimo niyang hinigugma. Nakaseguro siya nga wala kini molakaw. Anaa ra kini sa giabangan nga lawak. Managsama sila nga walay trabaho sa gabii. Dili laagan si Nymia nga pagka babaye. Lahi kini sa mga kaubang boarders nga dili mahimuyo kun dili makasuroy magabii.

Taga probinsiya si Nymia ug wala pay tuig sa pagka tindera sa inilang shopping mall sa siyudad. Nakaila kini ni Daniel tungod sa iyang higala nga si Sammy. Gidaldal siya niini pagpakuyog nga mamisita human sa ilang daklit nga panag-inom. Higala ug kauban sa boarding house ni Nymia ang trato ni Sammy nga si Juvelyn. Napugos siya pagkuyog ilabina nga nagbinugtong usab siya sa giabangan nga lawak sa dalan Borja. Naabtan nila ang managhigala sa gamay nga lawak-dawatanan sa gipuy-an niini.

Wala magdugay ang panagkabildo nila ni Sammy ug Juvelyn sa sala. Giagda kini sa nobya nga mobalhin pagsultihanay  sa lawak niini. Madisturbo man gud ang ilang panaghinabi sa mosulod-gawas  nga mga boarders. Wala sab madugay, misunod sila ni Daniel ug Nymia pagsulod sa lawak sa naulahi. Misignunot ang ulitawo kang Nymia nga misaka sa itaas.

Nag-ukon-ukon siya sa pagsulod sa lawak sa babaye. Gibati siya og kataha. Wala siya maanad pagsulod sa dili kaugalingon nga lawak. Apan mapugsanon si Nymia nga miganoy kaniya sa sulod. Gamay lang ang lawak nga alang sa usa ka tawo. Gawas sa katre nga nasimpig sa bungbong may lamesita usab nga nagsilbeng kan-anan niini. Milingkod sila sa ngilit sa katre.

Sa sinugdan gibati sa kabakikaw si Daniel nga nakigkabildo kang Nymia sa ingon niadto nga sitwasyon. Gigil-asan siya nga nagkadikit sila sa paglingkod. Matag karon ug unya magkapingki ang ilang mga bukton.

“Pasensiya ka na, ha... Dan?” Hinay ang tingog ni Nymia. Magulang lang kini sa hagawhaw. “Apiki man gud ning among sak-anan tungod sa kadaghan sa nag-abang.”

Nabatyagan ni  Daniel ang hinungaw sa gininhawa ni Nymia. Matag karon ug unya, dili siya makalikay pagpasiklap sa hamis ug hugot nga mga paa niini. Hiktin kaayo ang gisul-ot nga short nga luag ang manggas. Ubos usab ang liab sa string-shirt nga nakapadayag sa puti niining dughan. Midaylang pag-ayo ang kanal nga nag-utlan sa bus-ok nga mga muto. Wala kini mag-bra hinungdan nga mihulma ang duha ka tumoy sa nagpanikad niining suso. Midayag pa gyud ang nalubyok nga pusod nga wala masapo sa mubo nga sidsid sa gisul-ob nga sapot.

Wala na makapugong si Daniel sa nag-aliwaros nga pagbati. Ingon sa gisugkay sa dili mahubit nga pagbati ang iyang galamhan. Nagpanglad-ok siya sa hagkot nga laway. Gibati na siya sa tumang kahinam. Gikuptan niya ang kamot ni  Nymia. Hinay niya kining gipisil. Wala moantihay si Nymia. Gitutokan niya kini. Maulawong miduko ang babaye. Sa kinidlap sa mga mata niini, nahubad ni Daniel  nga nakagusto kini sa iyang gibuhat. Giagbayan niya kini dungan sa paghunghong.

“I-I... love you, Nym...” Bisan wala makaseguro sa iyang gibati apan nalibkas kini sa mga ngabil ni Daniel. “Makadani ang imong katahom.... ang imong kaseksi!”

Gibilikisan na sa mga bukton ni Daniel ang lumoy nga hawak ni Nymia. Miyahat kini kaniya nga sama sa nagpaabot sa mosunod nga hitabo. Giwahing ni Daniel ang suwang sa babaye. Hinay kining gihatod sa uhaw niyang mga ngabil. Hugot nga migakos kaniya ang babaye nga mitubay sa iyang romansa. Dali nga nalihokan ang wala nga kamot ni Daniel. Nanghapyod kini sa lison nga paa ni Nymia hangtod nga yano nga mikamang sa nabuka nga bilahan niini. May gituhiltuhil ang iyang mga tudlo.

“Ohhh...! K-kalami sa imong gihimo, Dan!” Miutnga si Nymia. Nahalit-ad kini. Napahit niya paghinay ang ngabil ni Daniel. “D-Dan... dugayon nato ‘ni, ha?”

Kadali ra sila nga nangaligid sa katre ni Nymia dungan sa pagpangatagak sa ilang mga sapot sa salog. Wala magpalandong si Daniel nga ingon niadto kasayon ang pagsulod niya sa langit. Ang pag-angkon niya sa pagkababaye ni Nymia. Ang pagkutlo niya sa gihay sa pagkabulak niini.

Ang misunod nga mga higayon sa ilang panagdula sa kama ingon sa naandan na nga ritwal matag pamisita ni Daniel. Nahigam sila pagdimdim sa kalipay. Hidlawon na sila sa usag-usa niini. Mao nga sa matag bagat nila sa gipuy-an ni Nymia mosangko gyud sila sa pagtagbaw sa lawasnong panginahanglan.

Nag-tricycle lang si Daniel. Lahutay ang lanat sa habuhabo. Gipahunong niya kini sa atbang sa gisak-an ni Nymia. Baskog siya nga mitabok sa kalsada. Gipandongan lang sa iyang palad ang ulo.

Nahitalunong siya sa paghitangka niya sa sala. May bisita nga gikahinabi si Nymia. Mitindog kini sa pagkamatikod kaniya. Giduol siya sa babaye nga gisunod usab sa lalaki.

“Dan, siya si Nilo... akong bana. Nil, siya si Dan... bag-o kong nahigala dinhi sa siyudad!” Paila ni Nymia sa lalaki nga miagbay kaniya. “Mopauli na ko ugma, Dan... kuyog ni Nilo. Makigbalik siya nako human sa wala namo pagsinabtanay hinungdan nga milakaw ko ug  nanarbaho dinhi sa siyudad. Salamat sa panahon nga gigahin mo kanako!”

Nanglipaghong si Daniel sa wala palandonga nga  kamatuoran sa tinud-anay nga pagkatawo ni Nymia nga nagdulot kaniya sa kalipay sa daklit nga panahon. (Kataposan)