Gabii na, Rey Corpuz!

Human makapamahaw, miadto dayon si Rey sa shop ug gikuha ang iyang sakyanan. Nalipay siya sa paspas nga pagtrabaho sa mga trabahador maong iya silang gihatagan og pahalipay nga tag P200 matag usa. Nagpasalamat siya nga dali rang nahuman og trabaho ang iyang sakyanan nga nakaangkon og dakong kadaot gumikan sa iyang pagpakigsangka sa mga kaaway didto sa North Reclamation area.

Samtang nagsubay na si Rey sa dalan balik sa hotel nga iyang giistaran sakay sa iyang awto, nalantawan niya didto sa unahan ang usa ka babaye nga nagbarog duol sa usa ka sakyanan nga naghunong sa daplin sa dalan. Mopara kini sa mga sakyanan nga miagi apan gilabyan lang kini. Nakasabot si Rey nga nagkinahanglan og tabang ang maong babaye maong iya kining gihunongan paghitungod niya sa nahimutangan niini. Unya giablihan niya ang awtomatik nga bentana sa tuong habig sa iyang awto.

“Unsay ato, Miss?” Sukit ni Rey sa maanyag nga babaye nga sa iyang tan-aw susamag panagway ni Keira Knightly sa pelikulang Pirates of The Carribean.

“M-mahimo bang tabangan ko nimog ilis sa na-flat nga ligid sa akong sakyanan, Mister?” May pangaliyupo nga miubay sa tingog sa babaye.

“Sure,” sanong ni Rey.

Dihadiha gilugar ni Rey ang iyang sakyanan aron dili kini maka-obstruct sa trapiko. Gipahimutang niya kini luyo sa nag-urong nga sakyanan nga gipanag-iya diay sa babaye. Unya mikanaog si Rey ug miduol sa babaye.

“Hain ang imong tools?” Sukit ni Rey.

“Naa diha,” gitudlo sa babaye ang compartment sa sakyanan niini.

Abtik nga milihok si Rey. Gikuha niya ang mga gamit ug gitangtang ang mihiyos nga ligid sa sakyanan sa babaye. Unya gitaod niya ang laing ligid ilis niini. Kadali ra niyang nahuman ang maong gimbuhaton. Nanarapo dayon siya sa nagkahugaw niyang kamot. Gisunod niya’g trapo sa panyo ang iyang singot.

“Daghan kaayong salamat, Mister...”

“Rey,” paila niya sa kaugalingon. “Rey Corpuz.”

“Ako usab si Loida Geligao,” paila sa babaye sa kaugalingon niini. -- Sumpayan pa