Dugos ni Eva

Naghinuktok ko. Akong gihunahuna kun mosanong ba ko sa awhag ni Rodney nga magkita mi sa Marcelo Beach Resort inigka Sabado.

“Ayaw kog balibari, Eva,” gikan ni Rodney.

“Nganong sa Marcelo Beach man gyud ta magkita?” Gisukit ko siya.

“Mas maayo didto kay magkasulti tag maayo nga walay makatugaw nato.”

Misugot ko sa iyang gihangyo. Nagkasabot kami si Rodney.

Tuod man, nianang pagka Sabado, nananghid ko ni Mama Betty nga moadto sa Marcelo. Gipatuo ko lang si Mama nga gidapit ko sa pipila nako ka higala nga mangaligo og dagat didto. Maayo gani kay misugot ang akong inahan. Nahinayon gayod ang sabot namo ni Rodney nga magkita sa beach resort sa Marcelo. Mikuha mig cottage.

“Maayo gani kay wala mokiha ang mga ginikanan ni Leroy,” matud ko dihang nasulod na kami sa cottage. “Ug wala sab masayri sa atong mga magtutudlo ang inyong panag-away. Maayo hinuon aron wala na tay problema.”

“May problema gihapon, Eva,” ni Rodney pa, “kun dili gyud mohunong si Leroy sa pagpangulitawo nimo.”

“Pasagdi na lang god na siya. Ikaw bitaw ang akong gihigugma.”

“Salamat sa imong gugma, Eva. Karon gusto kong imong imatuod nga ako ra gyud ang imong higugmaon hangtod sa kahangtoran.”

Nagkatinutokay kami si Rodney. Unya inanay niyang gipaduol ang iyang ngabil sa akong ngabil. Mipiyong ko dihang hapit na mag-abot ang among mga ngabil. -- Sumpayan