Gabii na, Rey Corpuz!

Pagkaugma sa buntag, gisayo ni Rey paghatod ang iyang sakyanan ngadto sa usa ka shop aron ipa-repair ang nangaguba nga bahin niini nga naigo sa mga bala. Nangabuak ang bildo sa iyang awto ug nangagasgas usab ang bungbong niini. Gitagalan siya’g usa ka semana sa shop nga mahuman pagtrabaho ang iyang sakyanan.

“Mohatag ko ninyo’g pahalipay kun mahuman kini sa labing daling panahon,” giingnan ni Rey ang mga trabahante sa shop. “Gikinahanglan man god nako kining maong sakyanan sa dinalian kong trabaho.”

“Paninguhaon lang namo, Sir,” nagkanayon ang usa sa mga trabahante. “Kontakon lang ka namo kun mahuman na namog trabaho. Dako-dako ra ba ang ayohonon niini.”

“Ayaw kabalaka,” ni Rey pa. “Mobayad ko bisan pila. Ang mahinungdanon nga madali ang pagtrabaho ninyo niini kay importante kaayo kini sa akong trabaho.”

“Paningkamotan namo, Sir,” nagkanayon ang trabahante.

Nagkasabot sila. Gihatagan ni Rey ang mga trabahante sa numero sa iyang selpon. Gipatabanan niya kinig tibuok P100 nga pakonsuylo sa mga trabahante.

“Kamo nay bahalang magbahinbahin niana,” ni Rey pa. “Panigarilyo lang god.”

“Salamat, Sir,” matud sa usa sa upat ka trabahante nga iyang gikahinabi.

Nagpahatod si Rey og taxi ngadto sa hotel nga iyang giistaran. Sa iyang pag-abot, gihukas dayon niya ang gisul-ob nga polo. Mihigda siya sa kama. Gusto siyang mopahulay. Wala siya’y tarong kinatulgan kagabii tungod sa nahitabo.

Nakatulog gayod si Rey. Nahinanok siya’g maayo. Palis na siyang nakamata. Maoy nakapukaw niya ang sagunson nga pagtingog sa buzzer sa iyang suite. Mibangon siya ug mipaingon sa pultahan. Kompiyansa ra kaayo siya nga dili armado ang tawo nga naa sa gawas sa pultahan kay wala man mo-vibrate ang iyang relo.

Pagkatukas sa palid sa pultahan, mibantang sa iyang panan-aw ang bayhon ni Althea. Mipahiyom kini kaniya. Misamot kaguwapa si Althea sa pagbathay sa pahiyom niini. Makabibihag gayod si Althea. Daw bato-balani ang katahom niini.

Misulod si Althea sa iyang suite. -- Sumpayan pa