Dugos ni Eva

Nangayog pasaylo si Rodney kanako sa iyang pagpakigsinumbagay kang Leroy. Misaad siya nako nga dili na siya mousab sa paghimo sa ingon. Sama nako, dili sab diay siya buot nga mahilambigit sa eskandalo ang among relasyon.

“Wad-a na kanang imong kaseloso,” giingnan ko siya. “Mao kanay nakaingon nga nagkasinumbagay kamo si Leroy.”

“Bisan kinsa na man sab tingaling lalaki nga makauyab og sama nimo ka guwapa,” ni Rodney pa, “magselos gyud kun dunay laing lalaki nga magbirig-birig nimo.”

Flattered ko sa gisulti sa akong boyfriend. In fairness, daghan ang nag-ingon nga susama kog panagway ni Monica Belucci. Pero dili kini rason nga mag-away ang mga lalaki tungod nako. Dili ko gustog ingon niining matang sa hitabo.

“Kinahanglang kontrolahon mo ang imong kaugalingon,” gimaymayan ko si Rodney.“Salig nga dili ko makahimo pagbudhi sa atong gugma.”

“Dili ko lang kapugngan ang insecurity nga mopatigbabaw sa akong galamhan,” nagkanayon si Rodney sa sinultihan nga tugob sa kaseryoso.

“Paningkamoti nga mawagtang na kanang imong insecurity.”

“Mawagtang lang tingali kining akong insecurity, Eva, kun maseguro ko na gayod nga ako nay makatag-iya kanimo sa hingpit.”

“Unsay buot mong ipasabot?”

“Pamatud-i ang imong gisulti nga ako ray makatag-iya nimo.”

“S-sa unsang paagi?”

“Magkita ta sa Marcelo Beach karong Sabado.” – Sumpayan