Kadtong tulisan sa jeepney

Nakaila ko si Joel sa dihang nagkauban kami sa klase sa ika-tulong tuig sa hayskol sa usa sa mga tunghaan sa dakbayan sa Sugbu. May pagkabadlongon apan mahigalaon kang bisan kinsa mababaye o lalaki.

Kon mahutdan siyag papel o wa siyay ballpen ako ang sagad niyang duolon. Gumikan kay duha man ka ballpen ang akong sagad dad-on sa tunghaan dili ko siya mabalibaran. Malooy man sad gud ko niya labi nang akong nahibaw-an  ang lisud nilang kahimtang.

"Looy baya sad diay na si Joel, Rose no? Way trabaho ang iyang amahan ug ang iyang inahan maninda lang og isda," matud pa sa akong kauban sa klase nga mao sad ang duolon ni Joel aron pangayoan og papel kon di ko katambong sa klase.

Kon panahon sa eksaminasyon, sagad nakong mahibaw-an nga kanunay'ng mag-promisory note si Joel aron lang makaapil sa among pasulit. Dili siya maglisud pagkuha og promissory note kay di man mahalon ug estrikto ang tagdumala sa among tunghaan.

Sa dihang migradwar na ko sa hayskol ug mipadayon sa akong pagtuon sa kolehiyo, wa na na ko makita si Joel. Nakaseguro kong wa na siya makapadayon sa pag-eskwela tungod sa lisud nilang kahimtang sa panginabuhi.

Usa ka gabii niana, padung na kong mopauli gikan sa tunghaan sakay sa usa ka jeepney sa dihang usa ka lalaki nga among gikasakay ang kalit lang mipahibawong tulis.

"Way mopalag, ha?! Ihatag nang inyong mga selpon," matud pa sa lalaking nagtion sa iyang pusil tumong sa mga pasahero.

Sa akong banabana, ika-lima kong naglingkod ambihas sa gilingkuran sa tulisan. Labihan nakong kuyawa ug nagtuo kong mao usab ang gibati sa ubang pasahero nga pulos mga babayeng mipagawas sa ilang mga selpon lakip nako nga medyo mikurog  na sa kahadlok.

Apan sa dihang amo nang gitunol ang among mga selpon ngadto sa nagbinugtong nga tulisan, nahibulong ko kay wa apila ang akoa pagkuha. Labihan nakong kurata sa dihang nadan-agan sa suga sud sa jeepney ang nawong sa tulisan ug naklaro nako ang iyang nawong bisan pa sa gisul-ob niyang baseball cap. Si Joel diay!

"Ihunong parts kay manaug ko!" ni Joel pa ngadto sa PUJ driver nga mi-menor sa dagan sa sakyanan. Wa huwata ni Joel nga mohunong kini ug dali siyang milayat ngadto sa  aspaltadong dan sa may Panganiban.

"Wa lagi kuhaan ang imong selpon, Miss," tuaw sa katapad nakong pasahero.

"Hibung bitaw ko. Basin gibatian sa akong selpon," dali kong tubag aron di kadudahan nga kaila nako ang tulisan.

Wa ko kasabut sa akong gibati. Gikuyawan apan nalipay sab nga wa apila pagkuha ang akong selpon. Pag-abot nako sa among balay sa Labangon gusto ko untang isugilon sa akong inahan ang hitabo apan nakahukom kong di na lang kay daghan unya siyag ipangutana bahin kang Joel.

Nakapahiyom na lang ko ug nakaingon sa akong kaugalingon nga, "Magbunga sab diay ang atong pagkamanggihatagon sa isigkatawo." Wa malimot si Joel sa akong kaayo kaniya. — Kataposan