Dugos ni Eva

Nakugang si Rodney dihang gitug-anan ko siya nga nangulitawo si Leroy nako. Nakapanglingo siya ug napahit niya ang iyang wait.

“Daan pa ko,” niya pa. “Nganong karon ka lang motug-an niini nako?”

“Tungod kay gusto kong dili kita magsigeg hisgot niya,” gipasabot ko si Rodney. “Nagtuo sab ko nga dili molahutay sa pagpanguyab ang kanahan kay giprangkahan ko man siya nga wala siyay paglaom diri nako. Pero taas og pailob ang kulokoy. Nagpadayon siya sa pagsamok nako.”

“Nganong ikaw man gyud ang iyang gipangulitawhan nga naa man untay daghang mga babaye nga wala pay tag-iya, kanang wala pay uyab?”

“Ako bitaw siyang giingnan nga anugon lang ang panahon nga iyang usikan sa pagpanguyab nako kay wala gyud siyay makuha pero dili gyud siya mopatuo.”

“Pakigsultihan ko si Leroy.”

“U-unsa?”

“Pasidan-an ko siya nga dili na magsamok nimo...sa atong relasyon.”

“Ayaw na lang, Rodney. Dili na kinahanglang makigsulti ka pa kaniya. Total, wala man gyud siyay paglaom nako. Igo na nga imong nasayran nga nangulitawo siya nako aron dili ka makaingon nga may gililong ako kanimo.”

Nagtuo ko nga mipatuo si Rodney sa akong gisulti. Apan ako na lang nasayran nga gipakigsultihan gyud diay niya si Leroy usa ka hapon niana sa amo nang pagpamauli gikan sa eskuylahan. Wala sila magkasinabot. Nagkasinumbagay sila. – Sumpayan