Hagawhaw nga ako ra ang imong gihigugma

Dili gayod tiaw ang akong kabalisa, kun ngano nga sa kabugnaw sa panahon, nanibug-ok man pagkalit ang kabugnaw sa akong singot sa kinatibuk-an sa akong kalawasan. Wa ako makasabot sa akong gibati, sulod ning dakong simbahan  sa lungsod sa San Fernando.

Dili man gud gusto si Nanay Posing nga tambongan ko pa ang kasal ni Perlaysa. Basin kuno ako kuyapan sa kaguol nga mowiwi sa akong dughan? Kinsa ba tuod nga lalakiha nga dili maguol nga ang imong hinigugma, hiusahon sa laing lalaki ngadto sa altar sa kaminyoon?

“Basin baya dili ka makapugong sa imong kaugalingon...Romy ug ikaw makuyapan sulod sa may simbahan?” dihay pahimangno kanako sa akong inahan.

“Ug ako pay ikaw anak...mas maayo pang dili nimo saksihan ang kasal sa imong hinigugma, kay magsakit lang sa imong dughan?” mitimang sa pagpasagbat si Tatay Pikto.

Wa lang tuyoa samtang naglingkod ako sa may lingkoranan sulod sa simbahan, aron paaboton ang ipahigayon nga kasal, inanay nanggisod sa akong panumdoman ang lunlon katam-is sa pulong ni Perlaysa nga initos ug pinaisan sa mga salingtuod sa  mga saad nga nagkanayon sa dihang kami rang duha sa may mahamis nga baybayon sa among balangay sa Pitalo.

“Makagawas na gani sa Ospital si Nanay Lilang, ato dayon nga sabotan ang adlaw sa atong kasal!”

“Ikaw ang mag-igo akong mahal nga Perlaysa!” mubo kong tubag kaniya samtang wa namo malikayi ang panag-ukobay sa duha namo ka mga ngabil nga uhaw sa gugma.

“Klingggggg...klangggggg...klangggggg!” kalit lang nahagtos ang nalungib nga bung-aw sa akong paghanduraw sa dihang mipaso na si Perlaysa uban kang Engineer Pinong Abaquita.

Gipig-it niya ang akong kamot ug dihay iyang gidunol nga sulat. Migawas ako sa simbahan ug didto ko basaha.

Mahal kong Romy,

Nasayod ako nga kusion sa tumang kasub-anan ang imong kasingkasing nga nagpakasal ako kang Engineer Pinong  Abaquita. Ang tinuod gumikan sa kadako nga balayranan sa Ospital ni Nanay Lilang, sa gipahigayon nga by-pass operation sa iyang kasingkasing, diin si Engineer Pinong Abaquita ang nag-asikaso sa pagbayad....napugos na lang ako sa pagpakasal kaniya bisan wa ko siya higugmaa!

Ang nagmahal kanimo,

Perlaysa

Subsob kaayo ang akong binakhoan ug didto gisinggit ko sa tuman nga nagkanayon:

“Kun mahimo, hagawhawa nga ako ra Perlaysa.... ang imong gihigugma!” – Kataposan