Gabii na, Rey Corpuz!

Pagkasunod adlaw, gisugdan na ni Rey ang gimbuhaton nga gisangon ni Althea kaniya. Nasayod na siya kun asa siya magsugod sa pagahimuon niyang imbestigasyon. Maoy unang gipakigkitaan ni Agent 11-M ang taga BFAD ug dayon ang taga PDEA. Gipasabot niya ang kadagkoan sa maong mga buhatan sa iyang tuyo. Gipatin-aw niya ngadto kanila nga dili siya manghilabot mahitungod sa kaso nga gisang-at batok sa VPL. Gusto lang siyang maghimog linain nga imbestigasyon aron pagsuta kun aduna ba gayod ing sindikato nga migamit sa ngalan sa VPL sa illegal nga pagpayuhot sa peke nga mga tambal gikan sa Australia.

Nakasabot ang taga BFAD ug taga PDEA kaniya. Mipasalig sila nga mokooperar sa pagahimuon niyang imbestigasyon. Misugyot gani ang taga PDEA kaniya nga labing maayo nga makig-alayon usab siya sa taga CIDG nga maoy naka-intercept sa pekeng mga tambal nga giadres ngadto sa VPL. Gituman ni Rey ang sugyot sa taga PDEA. Iya dayong gipakigkitaan ang kadagkoan sa CIDG ug gidaygan sa iyang tuyo. Nahinangop si Rey kay nakasabot dayon ang opisyal sa maong buhatan sa iyang tumong. Mitanyag pa kini nga mo-provide kaniya sa gikinahanglan niyang mga datos ug impormasyon alang sa himuon niyang imbestigasyon. Nagkasabot silang mag-coordinate matag karon ug unya kun unsa man ugaling ang dagan sa himuong imbestigasyon ni Rey.

Pagbalik niya sa hotel nga iyang giabtan, gipaslak ni Rey ang disket nga gihatag sa taga PDEA, BFAD ug CIDG kaniya sa iyang laptop computer. Gitagsatagsa niyag susi ang lima ka disket. Nagkadaiyang impormasyon ang sulod sa maong mga disket. Magamit kini niya sa pagahimuon niyang imbestigasyon. Bisan tuod nga ang maong mga kasayoran nagsentro bahin sa kasong giatubang sa VPL apan mahimo usab kining gamiton ni Rey nga sukaranan sa pagahimuon niyang linain nga imbestigasyon.

Nianang pagkaugma, nahiabot si Althea sa hotel nga giistaran ni Rey. Nagdala usab kinig mga disket ug mga dokumento nga makatabang pod sa gihimo niyang imbestigasyon. Nadungan ang mga datos nga nahipos ni Rey.

“Kaganina lang gihatag ni Atty. Quilaton kanako kanang maong mga dokumento,” ni Althea pa. -- Sumpayan pa