Ang diskarte ni Lauro

Niining gabhiona namisita na usab si Lauro kang Beata. Biyuda na si Beata sulod sa kapin usa ka  tuig. Samtang si Lauro usa ka ulitawong guwang. Wala siya naminyo kay giayran siya sa mga  babaye niadtong panahon sa iyang kabatan-on tungod sa iyang kasugarol.

Sukad nga nabiyuda si Beata, si Lauro magsige nag pangulitawo kaniya. Apan si Beata wala patental kang Lauro. Lig-on ang iyang baroganan nga dili na magminyo pag-usab, ilabi na kon ang lalaki nga mangawa sa kaniya sama kang Lauro ka sugarol.

Apan nagpadayon si Lauro paghalad sa iyang gugma ngadto sa biyuda. Hapit gabiing tanan nga mamisita ang ulitawong guwang kang Beata.

"Andam kong mobiya sa akong bisyo, Ta, basta imo lang kong sugton. Isaad nako nga mag-usab na ako sa hingpit sa akong kinabuhi kong maminyo na ta."

"Pangita na lag laing babaye, Ro."

Huyhoy ang abaga ni Lauro nga nanaog sa hagdanan sa panimalay ni Beata.

Dihang nakabiya na si Lauro, giserad-an ni Beata ang pultahan sa balay. Misulod siya sa iyang lawak-katulganan. Nag-inusara lang siya pagpuyo sa balay kay wala man sila makabaton og anak ni anhing Islaw.

Samtang naghigda sa kama sulod sa lawak, nakadungog si Beata og uwang sa iro nga diha ra sa tugkaran sa balay. Unya ang uwang sa iro gisapawan sa inaringkil sa mga kadena. Mitingkag ang mga dalunggan ni Beata ug nanglimbawot ang iyang mga balhibo. Nagpadayon ang mga inaringkil sa kadena didto sa gawas sa balay nga ingon sa nagpatungod sa lawak nga iyang nahimutangan. Gikulbaan siyag maayo.

"Beataaaaa..." Nadungog ni Beata ang bugnaw kaayong tingog nga daw naggikan sa ilawom sa yuta. "Beata... si Islaw kini....! Nagkondenar ang akong kalag tungod sa pagpunay'g samok ni Lauro kanimo....! Ayaw pagminyo kaniya, Beata...! Dili magmalinawon ang akong kalag kon magminyo ka ni Lauro..."

Unya nahilom. Wala na ang  uwang sa iro. Wala na ang inaringkil sa kadena. Wala na ang bugnaw'ng tingog nga iyang nadungog kaganina.

Nianang pagkasunod gabii namisita na usab si Lauro. Gisuginlan siya ni Beata nga nagkondenar ang kalag ni Islaw. Apan wala motuo si Lauro.

Dihang mipauli na si Lauro nga pakyas gihapon sa tuyo nini kaniya, nanerado dayon si Beata sa balay. Misulod siya sa lawak ug mihigda. Taudtaod miuwang ang iro ug nabati niya ang bugnawng tingog. "Si Islaw kini....!"

"I-Islaw," nagkurog ang tingog ni Beata, "kon ikaw man ugaling gayod kana, palihog ayaw na akog samoka. Patay ka na."

"Dili magmalinawon ang akong kalag, Beata... kon dili ko nimo padulgon karon....!

"U-unsa? A-apan..."

"Ablihi ang pultahan, Beata..."

Niadtong tungora ingon sa kalit nahanaw ang iyang kahadlok. Ingon sa nawala siya sa iyang kaugalingon. Mao na lamay iyang naamgohan nga migawas siya sa sala ug giablihan ang pultahan. Wala gani siya magpasiga og suga.

Dihay bayhon sa linalang nga nagdagtom nga misaka sa hagdanan. Nag-aringkil ang kadena sa mga tiil niini.

Ingon sa naulipon sa hipnotismo si Beata nga minunot sa linalang nga nagdagtom lang ang bayhon. Misulod siya sa lawak uban sa maong linalang. Kon kalag man gayod kini si Islaw o dili, wala na kini niya tukia.

"Gimingaw na kaayo ko nimo, Beata...." nagkanayon ang linalang nga migakos kang Beata.

"A-ayaw..." mikurog ang tingog ni Beata.

"Pasagdi ko, Beata..." Gimingaw na ko kanimo....! Sukad sa akong kamatayon wala na kita magkadulog...."

Wala n a makatutol si Beata dihang gigakos ug gihagkan siya sa maong linalang. Unya gipahigda siya niini ug mipatong kini kaniya. Bug-at kini. May kalag bang bug-at? Nakapangutana siya. Unya dihay misantop sa iyang hunahuna.

Kalit niyang gitukmod ang lalaki nga mitakubang kaniya. Kay wala makabantay, nahalagpot kini Gidali paghiram ni Beata ang posporo ug gidagkotan ang lamparilya. Nakugang siya pagkakita sa bayhon sa linalang nga nakasulod sa ilang kuwarto.Si Lauro! — Kataposan