Gabii na, Rey Corpuz!

(Gula 8)

Nakasabot si Rey sa gibati ni  Althea. Natugkad niya ang kahisagmuyo niini bahin sa temporaryong pagkasera sa VPL tungod sa pagkalambigit niini sa pagpayuhot og peke nga mga tambal. Dako na ang alkanse sa kompaniya gumikan sa pagkahunong sa operasyon niini. Apan gipasabot ni Rey si Althea.

“Dili ka sab makabasol kun nganong nangusog ang PDEA ug BFAD sa pagpasera sa VPL ug sa pagpahunong sa operation niini,” ni Rey pa. “Ang pagkalambigit sa VPL sa pagpayuhot sa pekeng mga tambal usa man ka kalapasan sa Republic Act 8203 nga mas nailhan nga Special Law on Counterfeit Drugs.”

“Mao lagi,” ni Althea pa. “Kini ang hinungdan nga gikuha ko ikaw aron pag-imbestigar niining kasoha. Gusto kong mamatud-an nga may sindikato gayod nga migamit sa ngalan sa VPL sa ilang pagpayuhot og pekeng mga tambal. Gusto  kong malimpiyo sa hingpit ang ngalan sa VPL ug makabalik na kami sa among normal operations.”

“Ayaw kabalaka,” nagkanayon si Rey. “Bisan ako kombinsido nga dakog posibilidad nga tinuod ang imong pangagpas ug pagduda. Busa ato kanang pamatud-an. Tabangan ko ikaw paglimpiyo sa ligdong nga ngalan sa VPL.”

“Daghang salamat, Rey,” ni Althea pa nga migakos sa lalaki.

Pagkilab sa pipila ka daklit, nag-akob na ang ilang mga ngabil. Wala madugay, diha na si Rey sa ibabaw sa hubo nga lawas ni Althea. Nagsaka-kanaog na siya sa ibabaw ni Althea. Nagpabatang si Althea nga naghayang nga nailawom kaniya.

Human sa ilang pagtagay sa lawasnong kalipay, mibangon si Althea ug nag-ilis. Mopauli na kini ngadto sa gipuy-an niini.

“Ihatod ko ikaw,” ni Rey pa.

“Okey,” ni Althea pa. “Ikaw ang mag-igo. Mao gyud nay akong tuyo nga wala ko magdala og kaugalingong sakyanan, aron imo kong ihatod. Aron ba usab makatultol ka sa balay nga akong gipuy-an nga bag-o lang gyung nahuman nako sa pagpatukod.”

Igo lang mipahiyom si Rey. Unya nanggawas na sila sa hotel. Midiretso sila sa parking area diin didto ang sakyanan ni Rey. — Sumpayan pa